Back
| DalaNews

Сенатор: “Халық неге ашулы? Себебі әділетсіздікке күйінеді”

Сенатор Мұрат Бақтиярұлы билікті жаңа буынға беретін кез келді дейді. Оның айтуынша соңғы уақытта қоғам қатты түрленіп, оның билікке қояр талабы да өзгеруде.


“Ауыспалы кезеңде болмай қоймайтын әлеуметтік жіктелістер мен мүдде алуандығы қоғамды жік-жікке бөлгендіктен қоғамымызда кем-кетіктер шаш етектен.

Үкімет тарапынан жүргізіліп жатқан экономикалық-әлеуметтік іс-шаралар бұқара халықтың әл-ауқатын көтеруге әлі де болса жетпей жатыр.

Осы кезге дейін жемқорлық деген жалмауызды ауыздықтау мүмкін болмай тұр. Жемқорлық індеті қоғамның барлық саласын жайлап алды.

Қарапайым халықтың да ашу ызасын тудыратын осы әділетсіздік. Сондықтан да Үкіметті, парламентті жалпы билік атаулыны қатты сынға алу белең алуда. Бұл заңды да.

Бір жағынан ұзақ жылдар Тоталитаризм табанында жаншылған қоғамдық сана арғы- бергідегі бар жоғалтқанына бірден жеткісі келіп көптеген талаптар қоюда. Толассыз ағылып жатқан дақпыртқа сенген, даңғазалыққа желпінген топтар көбеюде.

Бір анығы соңғы уақытта қоғам мүлдем өзгерді. Кеңестік иделогиядан ада, сауатты, ұлттық құндылықтарды бойына сіңірген жаңа ұрпақ билікке көптеп келуі керек. Аға ұрпақтың билік сабақтастығын жаңа буынға беретін де уақыты жетті деп ойлаймын.

Ең бастысы Мемлекеттігімізді, тәуелсіздігімізді шайып жіберетін күштерге жол бермеу қазақ ұлтының басты міндеті екенін үнемі есте ұстауымыз керек”, – дейді сенатор.