АҚШ президенті Дональд Трамп Nvidia компаниясының бұрынғы бас директоры Дженсен Хуангтың қызметіне қайта оралуына қарсы емес екенін мәлімдеді. Бұл мәлімдеме технологиялық алпауыттың басшылығындағы өзгерістер мен Хуангты қайта қызметке шақыру науқаны қызған тұста жасалды, деп хабарлайды dalanews.kz.
Бұған дейін Financial Times басылымы Хуангтың Nvidia басшысы қызметіне қайта оралу мүмкіндігін жақын ортасымен талқылағанын хабарлаған. Басылым дереккөздерінің мәліметінше, оның жақтастары Кремний алқабындағы жетекші кәсіпкерлер мен инвесторларды біріктіріп, компания директорлар кеңесіне ықпал ету үшін арнайы топ құрып жатыр. Олар Ақ үйдің де қолдауына ие болуға ниетті.
Reuters агенттігінің жазуынша, бұл бастамаға Хуангтың өзі де қолдау білдірген. Сонымен қатар Nvidia басшысының қайта оралуын талап еткен онлайн-петицияға 160 мыңнан астам адам қол қойған. Олардың арасында Tesla басшысы Илон Маск, Epic Games компаниясының жетекшісі Тим Суини және технология саласының басқа да өкілдері бар.
Хуанг 1993 жылы өзі құрған Nvidia компаниясын 33 жылға жуық басқарды. Алайда қараша айының 12-сінде ол компанияның бас директоры, президенті және директорлар кеңесінің мүшесі қызметінен кетті. Қазір компанияның қаржы директоры Колетт Кресс уақытша бас директор міндетін атқарып отыр.
Бұған дейін Трамп Nvidia-ның жаңа басшысы ретінде Apple компаниясының бұрынғы бас директоры Тим Кукті ұсынған еді. Ал АҚШ Қаржы министрі Скотт Бессент компания басшылығында түбегейлі өзгерістер қажет екенін айтып, Қытайға чип жеткізуге қатысты ықтимал заң бұзушылықтарды тексеруге шақырды.
Хуангтың қызметтен кетуіне оның жеке өміріне қатысты жарияланымдар мен Қытайдың ықтимал барлау қызметімен байланысы бар деген күдікке ілінген кәсіпкер әйелмен қарым-қатынасы туралы ақпарат түрткі болған. Nvidia директорлар кеңесі бұл жағдайға байланысты тәуелсіз тексеру бастаған. Аталған деректерге қатысты тергеу мен тексеру жұмыстары жалғасып жатыр.
Сонымен қатар компанияның директорлар кеңесі тұрақты бас директорды іздеу жұмысын жүргізуде. Financial Times дерегінше, Nvidia басшылығы ықтимал мұрагер ретінде Arm компаниясының бас директоры Рене Хаастың кандидатурасын да қарастырған.
Осылайша, Хуангтың Nvidia-ға қайта оралуы әзірге нақты шешілген мәселе емес. Компанияның түпкілікті шешімі директорлар кеңесінің ұстанымы мен жүргізіліп жатқан тексеру нәтижелеріне байланысты болады.