AQSh prezidenti Donald Tramp Nvidia kompaniiasynyń burynǵy bas direktory Djensen Hýangtyń qyzmetine qaita oralýyna qarsy emes ekenin málimdedi. Bul málimdeme tehnologiialyq alpaýyttyń basshylyǵyndaǵy ózgerister men Hýangty qaita qyzmetke shaqyrý naýqany qyzǵan tusta jasaldy, dep habarlaidy dalanews.kz.
Buǵan deiin Financial Times basylymy Hýangtyń Nvidia basshysy qyzmetine qaita oralý múmkindigin jaqyn ortasymen talqylaǵanyn habarlaǵan. Basylym derekkózderiniń málimetinshe, onyń jaqtastary Kremnii alqabyndaǵy jetekshi kásipkerler men investorlardy biriktirip, kompaniia direktorlar keńesine yqpal etý úshin arnaiy top quryp jatyr. Olar Aq úidiń de qoldaýyna ie bolýǵa nietti.
Reuters agenttiginiń jazýynsha, bul bastamaǵa Hýangtyń ózi de qoldaý bildirgen. Sonymen qatar Nvidia basshysynyń qaita oralýyn talap etken onlain-petitsiiaǵa 160 myńnan astam adam qol qoiǵan. Olardyń arasynda Tesla basshysy Ilon Mask, Epic Games kompaniiasynyń jetekshisi Tim Sýini jáne tehnologiia salasynyń basqa da ókilderi bar.
Hýang 1993 jyly ózi qurǵan Nvidia kompaniiasyn 33 jylǵa jýyq basqardy. Alaida qarasha aiynyń 12-sinde ol kompaniianyń bas direktory, prezidenti jáne direktorlar keńesiniń múshesi qyzmetinen ketti. Qazir kompaniianyń qarjy direktory Kolett Kress ýaqytsha bas direktor mindetin atqaryp otyr.
Buǵan deiin Tramp Nvidia-nyń jańa basshysy retinde Apple kompaniiasynyń burynǵy bas direktory Tim Kýkti usynǵan edi. Al AQSh Qarjy ministri Skott Bessent kompaniia basshylyǵynda túbegeili ózgerister qajet ekenin aityp, Qytaiǵa chip jetkizýge qatysty yqtimal zań buzýshylyqtardy tekserýge shaqyrdy.
Hýangtyń qyzmetten ketýine onyń jeke ómirine qatysty jariialanymdar men Qytaidyń yqtimal barlaý qyzmetimen bailanysy bar degen kúdikke ilingen kásipker áielmen qarym-qatynasy týraly aqparat túrtki bolǵan. Nvidia direktorlar keńesi bul jaǵdaiǵa bailanysty táýelsiz tekserý bastaǵan. Atalǵan derekterge qatysty tergeý men tekserý jumystary jalǵasyp jatyr.
Sonymen qatar kompaniianyń direktorlar keńesi turaqty bas direktordy izdeý jumysyn júrgizýde. Financial Times dereginshe, Nvidia basshylyǵy yqtimal murager retinde Arm kompaniiasynyń bas direktory Rene Haastyń kandidatýrasyn da qarastyrǵan.
Osylaisha, Hýangtyń Nvidia-ǵa qaita oralýy ázirge naqty sheshilgen másele emes. Kompaniianyń túpkilikti sheshimi direktorlar keńesiniń ustanymy men júrgizilip jatqan tekserý nátijelerine bailanysty bolady.