Tórt el Izraildi Gazaǵa gýmanitarlyq kómek kirgizýge shaqyrdy

Tórt el Izraildi Gazaǵa gýmanitarlyq kómek kirgizýge shaqyrdy
Ashyq derekkóz

Avstraliia, Kanada, Italiia jáne Ulybritaniianyń syrtqy ister ministrleri Izrail úkimetin Gaza sektoryna gýmanitarlyq kómektiń kedergisiz jetkizilýin qamtamasyz etýge shaqyrdy. Olardyń málimetinshe, shekarada shamamen 150 myń shatyr men basqa da qajetti gýmanitarlyq júk kirgizilmei tur, dep habarlaidy dalanews.kz.

Tórt eldiń syrtqy ister ministrleri birlesken málimdemeni 16 qarashada jariialady. Qujatta Gaza sektoryndaǵy gýmanitarlyq jaǵdaidyń qys mezgiliniń jaqyndaýyna bailanysty kúrdelene túskeni aitylǵan.

Ministrlerdiń málimetinshe, óńirde bolǵan sý tasqyny jergilikti turǵyndardyń jaǵdaiyn odan ári qiyndatqan. Qatty jaýyn-shashyn saldarynan palestinalyqtar turyp jatqan ýaqytsha lagerlerdi sý basyp, baspanasyz qalǵan adamdardyń turmysy nasharlaǵan.

«Gaza turǵyndaryna baspana men gýmanitarlyq kómek asa qajet. Alaida 150 myń shatyr men basqa da mańyzdy zattar shekarada ustalyp, sektorǵa kirgizilmei otyr», - delingen birlesken málimdemede.

Avstraliia, Kanada, Italiia jáne Ulybritaniia Izrail úkimetin gýmanitarlyq júkterdi ótkizý kezindegi kidiristerdi toqtatyp, Gaza aýmaǵyna kómektiń jedel ári kedergisiz jetkizilýine múmkindik berýge shaqyrdy.

Sondai-aq elder shekara ótkelderin ashýdy jáne gýmanitarlyq operatsiialar men infraqurylymdy qalpyna keltirýge qajetti qos maqsatta paidalanylatyn taýarlardy ótkizýge ruqsat berýdi talap etti.

Birlesken málimdemede qaqtyǵysýshy taraptarǵa atysty toqtatý rejimin saqtap, Gazaǵa qatysty keshendi jospardy oryndaý jáne halyqaralyq gýmanitarlyq quqyq talaptaryn qurmetteý jóninde úndeý jasaldy.

BUU málimetinshe, sońǵy nóser jaýyn men sý tasqyny saldarynan bes adam qaza taýyp, myńdaǵan otbasy ýaqytsha baspanasynan aiyrylǵan. Kóptegen palestinalyq áli kúnge deiin sýyq pen sý tasqynynan jetkilikti qorǵai almaityn shatyrlarda turyp jatyr.