AQSh-ta áýe qozǵalysyn basqarý júiesinde bolǵan aýqymdy irkilis jabdyqtardyń jańartý jumystary kezinde shamadan tys júktelýinen týyndaǵan. Bul týraly Aq úide ótken baspasóz máslihatynda AQSh kólik ministri Shon Daffi men Ulttyq qaýipsizdik ministri Markvein Mallin málimdedi, dep habarlaidy dalanews.kz.
Shon Daffidiń aitýynsha, eldiń aviatsiialyq júiesinde áli kúnge deiin birneshe ondaǵan jyl buryn ornatylǵan analogtik jabdyqtar qoldanylady. Ministrdiń pikirinshe, eski infraqurylym qazirgi júktemeni kótere almai otyr.
Jańartý kezinde marshrýtizatorlarǵa shamadan tys kóp derek túsip, sonyń saldarynan júiege kelip túsken aqparat bir-birine qaishy bolǵan. Aqyry mamandar júieni ýaqytsha óshirýge májbúr bolǵan.
Osyǵan bailanysty kólik ministri Kongresten aviatsiialyq infraqurylymdy jańǵyrtýǵa 50 mlrd dollar bólýdi talap etti. Onyń aitýynsha, máseleni sheshý úshin shuǵyl sharalar qajet.
Aviatsiialyq servisterdiń málimetinshe, aqaý saldarynan 6 myńnan astam reis toqtatylyp, 9 myńnan astamy keshikken. Taǵy 600-den astam ushaq basqa áýejailarǵa baǵyttalǵan. Sarapshylardyń baǵalaýynsha, jaǵdai shamamen 1,5 mln jolaýshyǵa áser etken.
AQSh-tyń Federaldyq aviatsiia basqarmasy (FAA) el aýmaǵynda ushýǵa engizilgen ýaqytsha tyiymdy shamamen 4-5 saǵattan keiin alyp tastady. Áýe keńistigi qaita ashylyp, áýe kompaniialary reisterdi birtindep qalpyna keltire bastady.
