AQSh prezidenti Donald Tramp kelesi aptada Qytaidyń Shenchjen qalasynda Resei prezidenti Vladimir Pýtinmen jáne Qytai tóraǵasy Si Tszinpinmen kezdesýdi josparlap otyr. Úshjaqty kelissózde iadrolyq qarýdy qysqartý jáne Iran tóńiregindegi jaǵdai talqylanady. Bul týraly Aq úi ókili Oliviia Ýeils málimdedi, dep habarlaidy dalanews.kz Anadolu agenttigine silteme jasap.
Kezdesý Aziia-Tynyq muhity ekonomikalyq yntymaqtastyǵy (ATES) sammiti aiasynda ótedi dep josparlanǵan.
Aq úi ókilderiniń aitýynsha, Vashington bul kezdesýden naqty kelisimge qol jetkizýdi kútpeidi. Kelissózdiń negizgi maqsaty – úsh el basshylary arasynda qarý-jaraqty baqylaý máseleleri boiynsha dialog bastaý.
Sonymen qatar Ýkrainadaǵy jaǵdai úshjaqty kezdesýdiń kún tártibine engizilmeidi. Bul másele AQSh pen Resei arasyndaǵy jeke kelissózderde qarastyrylyp jatyr.
Tramp pen Si Tszinpin jeke kezdesedi
19 qarashada Donald Tramp Qytai tóraǵasy Si Tszinpinmen ekijaqty kezdesý ótkizip, jumys túski asyna qatysady. Taraptar buǵan deiin qol jetkizilgen saýda kelisimderiniń oryndalýyn talqylamaq.
Sondai-aq AQSh tarapy Qytaidan sirek kezdesetin metaldardy jetkizý máselesin kóterýdi josparlap otyr. Vashington qazirgi jetkizilim kólemin jetkiliksiz dep sanaidy.
Donald Tramptyń Aziiaǵa sapary 16 qarashada bastalady. Aldymen ol Filippin astanasy Manilaǵa baryp, keiin Qytaiǵa attanady.
