АҚШ президенті Дональд Трамп келесі аптада Қытайдың Шэньчжэнь қаласында Ресей президенті Владимир Путинмен және Қытай төрағасы Си Цзиньпинмен кездесуді жоспарлап отыр. Үшжақты келіссөзде ядролық қаруды қысқарту және Иран төңірегіндегі жағдай талқыланады. Бұл туралы Ақ үй өкілі Оливия Уэйлс мәлімдеді, деп хабарлайды dalanews.kz Anadolu агенттігіне сілтеме жасап.
Кездесу Азия-Тынық мұхиты экономикалық ынтымақтастығы (АТЭС) саммиті аясында өтеді деп жоспарланған.
Ақ үй өкілдерінің айтуынша, Вашингтон бұл кездесуден нақты келісімге қол жеткізуді күтпейді. Келіссөздің негізгі мақсаты – үш ел басшылары арасында қару-жарақты бақылау мәселелері бойынша диалог бастау.
Сонымен қатар Украинадағы жағдай үшжақты кездесудің күн тәртібіне енгізілмейді. Бұл мәселе АҚШ пен Ресей арасындағы жеке келіссөздерде қарастырылып жатыр.
Трамп пен Си Цзиньпин жеке кездеседі
19 қарашада Дональд Трамп Қытай төрағасы Си Цзиньпинмен екіжақты кездесу өткізіп, жұмыс түскі асына қатысады. Тараптар бұған дейін қол жеткізілген сауда келісімдерінің орындалуын талқыламақ.
Сондай-ақ АҚШ тарапы Қытайдан сирек кездесетін металдарды жеткізу мәселесін көтеруді жоспарлап отыр. Вашингтон қазіргі жеткізілім көлемін жеткіліксіз деп санайды.
Дональд Трамптың Азияға сапары 16 қарашада басталады. Алдымен ол Филиппин астанасы Манилаға барып, кейін Қытайға аттанады.
