AQSh Federaldyq azamattyq aviatsiia basqarmasy (FAA) eldegi barlyq áýejaidan ushatyn ushaqtarǵa engizilgen ýaqytsha shekteýdi alyp tastady. Buǵan deiin aýqymdy telekommýnikatsiialyq aqaýǵa bailanysty áýe qatynasyna shekteý qoiylyp, myńdaǵan reis keshiktirilgen nemese toqtatylǵan edi. Bul týraly retteýshi organnyń resmi habarlamasynda aitylǵan, dep habarlaidy dalanews.kz.
Shekteý 13 qarashada dispetcherler men ushqyshtar arasyndaǵy bailanysty qamtamasyz etetin telekommýnikatsiialyq júielerde kúrdeli aqaý paida bolǵannan keiin engizildi. FAA qaýipsizdik maqsatynda barlyq áýejaida ushaqtardyń ushýyn ýaqytsha toqtatý týraly sheshim qabyldaǵan.
Aýada júrgen ushaqtarǵa reisterin jalǵastyryp, mejeli jerge qonýǵa ruqsat berildi. Al halyqaralyq reisterge qatysty sheshimder jeke tártippen qaraldy.
Ushýǵa qoiylǵan shekteý 4 saǵat 26 minýtqa sozyldy. Ol AQSh-tyń shyǵys jaǵalaýy ýaqytymen 15:53-te (Qazaqstan ýaqytymen 14 qarasha, 01:53) kúshine enip, 20:19-da (Qazaqstan ýaqytymen 06:19) alynyp tastaldy.
10 myńnan astam reis keshiktirildi nemese toqtatyldy
FlightAware servisiniń málimetinshe, AQSh-taǵy aqaý saldarynan 9 917 reis keshiktirilip, taǵy 733 reis toqtatylǵan. Osylaisha, jalpy sany 10 650 reistiń kestesi buzylǵan.
Aqaý áýe qozǵalysyn basqarý júielerine de áser etken. Málimetterge sáikes, eldegi 22 óńirlik áýe qozǵalysyn basqarý ortalyǵynyń radarlary men radiojiilikterinde bir mezgilde irkilis bolǵan.
Amerikalyq BAQ-tyń habarlaýynsha, alǵashqy tehnikalyq aqaýlar Chikagoda baiqalyp, keiin bailanys máselesi basqa dispetcherlik ortalyqtarǵa da taralǵan. Sonyń saldarynan áýejailarda jolaýshylar uzaq ýaqyt kútýge májbúr bolǵan.
AQSh biligi ne deidi?
AQSh-tyń Ulttyq qaýipsizdik ministri Markvein Mallin turǵyndardy sabyr saqtaýǵa shaqyrdy. Onyń aitýynsha, bilik jaǵdaidy baqylaýda ustap otyr jáne áýede júrgen barlyq ushaqtyń qozǵalysy qadaǵalanǵan.
Ministr sol kezde aqaýdyń qasaqana jasalǵan shabýyldan bolǵanyn kórsetetin belgiler joq ekenin málimdedi. Degenmen mamandar oqiǵanyń naqty sebepterin anyqtaý jumystaryn jalǵastyryp jatyr.
AQSh kólik ministri Shon Daffi de FAA mamandarynyń tehnikalyq aqaýdy tergeýge kiriskenin rastady.
Keiin FAA el boiynsha ushýǵa qoiylǵan ýaqytsha tyiymnyń kúshin joiyp, áýe qatynasyn qalpyna keltirýge múmkindik berdi.
