Ǵumarbek Daýkeev atyndaǵy Almaty energetika jáne bailanys ýniversiteti (AEjBÝ) «Zań men tártip» respýblikalyq bastamasyn qoldaý maqsatynda «ORTAQ 2026 - jaýapkershilik aýmaǵy» atty qalalyq stýdenttik baiqaýdyń resmi bastalǵanyn habarlaidy. Almaty qalasynyń joǵary oqý oryndarynyń stýdentterine arnalǵan bul aýqymdy sharanyń jalpy júlde qory 3 000 000 teńgeni quraidy, dep habarlaidy dalanews.kz.
Baiqaýdyń negizgi ideiasy - jastardyń quqyqtyq jáne tsifrlyq saýattylyǵyn arttyrý, «Zań men Tártip» qaǵidattaryn qurmetteýge tárbieleý, sondai-aq ýniversitet pen qala ortasyn qaýipsiz etýge baǵyttalǵan naqty stýdenttik jobalardy qoldaý. Úzdik dep tanylǵan tehnologiialyq sheshimder keiinnen pilottyq engizýge daiyndalatyn bolady.
Jobalar men ázirlemeler kelesi mańyzdy baǵyttar boiynsha qabyldanady:
• Quqyqtyq saýattylyq: quqyqtar men mindetterdi túsiný, kómekke júginý joldary.
• Tsifrlyq qaýipsizdik: derekterdi qorǵaý jáne alaiaqtyq áreketterdi erte anyqtaý.
• Qaýipsiz kampýs: táýekelderdi azaitý jáne qoljetimdi orta qalyptastyrý.
• Jaýapty minez-qulyq: ózara qurmet, múlikke uqypty qaraý jáne ózara kómek.
• Tsifrlyq infraqurylymdy qorǵaý:servisterdiń turaqtylyǵy men aqparattyq qaýipsizdik.
Baiqaýǵa Almaty qalasynyń joǵary oqý oryndarynda bilim alatyn 17–25 jas aralyǵyndaǵy stýdentter jeke nemese 2-5 adamnan turatyn komanda quramynda qatysa alady. Qatysý tegin, ár qatysýshy bir joba usyna alady. Jumystar qazaq, orys jáne aǵylshyn tilderinde qabyldanady.
Mańyzdy merzimder:
• 9 qarasha 2026 jyl - ótinimderdi qabyldaýdyń resmi bastalýy.
• 4 jeltoqsan 2026 jyl (saǵat 18:00-ge deiin)- qorytyndy materialdardy qabyldaýdyń sońǵy kúni.
• 10–11 jeltoqsan 2026 jyl - baiqaýdyń finaldyq kezeńi (DALA EDGE alańy, Qaskeleń q.).
Barlyq suraqtar boiynsha science@aues.kzelektrondy poshtasy nemese +7 708 253 1353 (bailanys tulǵasy - Nogaibaeva Makpal) arqyly habarlasýǵa bolady.
Jastardyń kreativti oiy men jasandy intellekt, robototehnika jáne zamanaýi tsifrlyq tehnologiialar salasyndaǵy sheshimderi qalamyzdy taǵy da bir qadam qaýipsiz etýge óz úlesin qospaq! BAQ ókilderin aqparatty taratýǵa jáne baiqaýdyń finalyn aqparattyq turǵydan qoldaýǵa shaqyramyz.
