Qazaqstandyq kásipkerler 2027 jyly ońailatylǵan deklaratsiia negizinde jumys isteitin kompaniialarmen jasalǵan B2B mámileler boiynsha salyq shegerimine tyiymdy alyp tastaýdy usynyp otyr. Biznes bul ózgeristi 2026 jyldyń 1 qańtarynan bastap, iaǵni keri kúshpen qoldanýdy suraidy. Qazir usynys Úkimet qaraýynda, dep habarlaidy dalanews.kz.
Atalǵan shekteý jańa Salyq kodeksi kúshine engen 2026 jyldyń 1 qańtarynan bastap qoldanyla bastady. Sonyń saldarynan jalpyǵa birdei salyq rejimindegi kompaniialar ońailatylǵan deklaratsiia negizinde jumys isteitin kásipkerlermen jasalǵan mámileler boiynsha shyǵyndardy salyq shegerimine jatqyza almaidy.
Kásipkerler bul talapty ózgertý qajet dep sanaidy. Olardyń pikirinshe, eger shegerimderge qatysty tyiym alynyp tastalmasa, 2026 jyly jumysyn jalǵastyrǵan kásiporyndar kelesi jyldyń naýryz-sáýir ailarynda salyq tóleý kezinde qarjylyq qiyndyqqa tap bolýy múmkin.
Uchet.kz kompaniialar tobynyń negizin qalaýshy, salyq sarapshysy Maksim Baryshevtiń aitýynsha, biznes óz usynystary men negizdemelerin Ulttyq kásipkerler palatasy, Respublica partiiasy jáne basqa da uiymdar arqyly Úkimetke joldaǵan.
«Biz Ulttyq kásipkerler palatasy, Respublica partiiasy jáne basqa partiialar arqyly barlyq negizdemelerimizdi usyndyq. Ońailatylǵan rejimdegi kásipkerlermen jasalǵan B2B mámileleri boiynsha shegerimderdi jalpyǵa birdei salyq rejimindegi kompaniialarǵa qaitarý qajet. Qazirgi ýaqytta Úkimet bul málimetterdi aldy», - dedi Maksim Baryshev.
Sarapshy bul usynys 2026 jyldyń qarasha aiynyń sońyna deiin Quryltaiǵa engizilýi tiis Salyq kodeksine túzetýler jobasyna engiziledi dep úmittenedi.
«Eger qazir B2B mámileleri boiynsha salyq shegerimderi qaitarylmasa, 2026 jyly jumysyn jalǵastyryp jatqan kásipkerlerge 2027 jyldyń naýryz-sáýir ailarynda salyq tóleýge qarajat jetpeýi múmkin. Óitkeni olar ońailatylǵan rejimdegi kásipkerlermen jasalǵan mámileler boiynsha tabys salyǵyn tóleýge májbúr bolady», - dep túsindirdi ol.
Budan bólek, biznes salyq júiesin jetildirýge qatysty taǵy eki usynys jasaǵan. Birinshisi - jalaqy qorynan biýdjetke jáne biýdjetten tys qorlarǵa tólenetin salyqtar men mindetti tólemderdi qysqartyp, olardy túsinikti biryńǵai salyqqa biriktirý.
Ekinshi usynys kásipkerlerdi tekserý jáne baqylaý júiesin qaita qaraýǵa qatysty. Maksim Baryshevtiń pikirinshe, baqylaý tetikteri de júieli túrde pysyqtalýy kerek.
Kásipkerlerdiń usynystary Úkimettiń qaraýynda. Olardyń qabyldanýy Salyq kodeksine engiziletin túzetýlerge bailanysty bolmaq.
