Almaty soty jýrnalist ári bloger Vadim Boreikony qurylys kompaniiasyna 43 mln teńgeden astam shyǵyn tóleýge mindettedi. Buǵan onyń áleýmettik jelide turǵyn úi kesheniniń qurylysy zańsyz júrgizilip jatqany týraly taratqan aqparaty sebep bolǵan. Sot bul málimetterdi shyndyqqa sáikes kelmeidi dep tanydy, dep habarlaidy dalanews.kz.
Sot málimetinshe, Boreiko óziniń "Giperborei" YouTube-arnasy men Instagram paraqshasynda turǵyn úi kesheniniń qurylysy zańsyz júrgizilip jatqanyn jáne qurylys kompaniiasynda qajetti ruqsat qujattary joq ekenin aitqan.
Alaida sot taraptardyń dálelderi men saraptama qorytyndylaryn zerttep, jýrnalist jariialaǵan aqparat shyndyqqa sáikes kelmeidi ári kompaniianyń iskerlik bedeline nuqsan keltirdi degen qorytyndyǵa keldi.
Ekonomikalyq saraptama qurylys kompaniiasyna kelgen shyǵyn kólemin 43 mln teńgeden astam dep eseptegen. Osyǵan bailanysty sot Boreikodan atalǵan somany jáne sot shyǵyndaryn óndirip alýdy mindettedi.
Sonymen qatar sot sheshimi kúshine engennen keiin jýrnalist 10 kún ishinde YouTube pen Instagram-da teriske shyǵarý jariialap, daýly jazbalar men beineúzindilerdi óshirýge tiis.
Sot sheshimi ázirge zańdy kúshine engen joq.
