Qaraǵandy oblysynda eki aiǵa jýyq ýaqyt buryn joǵalyp ketken áiel óli tabyldy, dep habarlaidy dalanews.kz.
38 jastaǵy Irina Kernniń súiegi 13 qarashada Temirtaýdan shamamen 22 shaqyrym jerden tabyldy. Politsiianyń málimetinshe, áieldiń denesinen zorlyqpen óltirý belgileri anyqtalǵan. Kisi óltirdi degen kúdikpen 40 jastaǵy er adam ustalyp, ýaqytsha ustaý izoliatoryna qamaldy.
Irina 20 qyrkúiekke qaraǵan túni joǵalyp ketken. Ápkesiniń aitýynsha, áiel joǵalar aldynda azamattyq nekedegi kúieýimen janjaldasqan. Sol kezde úide onyń uly men barar jeri bolmaǵandyqtan, panalap júrgen 19 jastaǵy jetim jigit te bolǵan.
Tańǵy saǵat alty shamasynda úi ishi tynyshtalyp, artynsha esik tars jabylǵan. Úidegiler oianǵanda, Irina joq bolyp shyqqan. Alaida onyń úiden qalai ketkenin eshkim kórmegen.
Áiel joǵalǵannan keiin týystary ony ózderi izdei bastaǵan, tanystaryna habarlasyp, bolýy múmkin jerlerdi teksergen jáne sol túni bolǵan oqiǵalardy eske túsirýge tyrysqan. Politsiiaǵa onyń joǵalǵany týraly resmi aryz tek 2 qazanda tirkelgen.
Kisi óltirý deregi boiynsha sotqa deiingi tergeý bastaldy. Marqumnyń artynda úsh balasy qaldy.
