Almaty oblysy Jambyl aýdanynyń turǵyndary birneshe jyldan beri mal urlyǵynan zardap shegip otyrǵanyn málimdedi. Tórt túlikti kúnkóris kózine ainaldyrǵan aýyl halqy endi qoradaǵy malyn kúni-túni kúzetýge májbúr, dep habarlaidy dalanews.kz.
Bul týraly Egov.Press jariialaǵan beinematerialda aityldy.
Turǵyndardyń sózinshe, keiingi tórt-bes jylda aýdanda 500-ge jýyq jylqy men siyr qoldy bolǵan. Máselen, Saýryq batyr aýylynda 32 jylqy men 6 siyr, Qarasaida 17 jylqy men 5 siyr joǵalǵan. Al Qarasý aýylynan 45 jylqy urlanǵany aitylady.
Malynan aiyrylǵan turǵyndar Qarasý, Eńbekshi, Qyzylasker, Jambyl, Úshbulaq, Saýryq batyr jáne Qarasai aýyldarynan jinalǵan.
Jergilikti turǵyndardyń biri urlyq kóbine kúzde, mal taýdan aýylǵa túsetin kezeńde bastalatynyn jetkizdi.
"Bul jaǵdai tórt-bes jyldan beri qaitalanyp keledi. Urlyq kúzge qarai, mal taýdan túsken kezde bastalyp, qar jaýǵanǵa deiin jalǵasady. Politsiiaǵa habarlasamyz. Qyzmetkerler kelip, qajetti málimetterdi tirkep, izdeý júrip jatqanyn aitady. Biraq ázirge nátije joq", — deidi ol.
Aýyl turǵyndary urylar maldyń semiz ne aryq ekenine qaramaitynyn, qolaily sát týsa, aidap áketetinin alǵa tartty. Sondyqtan halyq qaraýsyz qalǵan malyn ǵana emes, qoradaǵy tórt túligin de kúzetýge kóshken.
Jábirlenýshilerdiń biri onyń malyn urlady degen kúdikpen eki adamnyń ustalǵanyn, alaida keiin olardyń jaýapkershilikke tartylmaǵanyn málimdedi. Onyń aitýynsha, kúdiktilerdiń jaqyn týystary quqyq qorǵaý organdarynda jumys isteýi múmkin.
"Eki adam ustalǵan edi. Biraq keiin bosatylyp ketti. Olardyń týystarynyń politsiiada qyzmet etetinin estidik. Sondyqtan istiń ne sebepti sońyna deiin jetkizilmegenin bilgimiz keledi", — dedi turǵyn.
Jambyl aýdanynyń turǵyndary mal urlyǵyna qatysy bar adamdardy anyqtap, tiisti jazaǵa tartýdy talap etip otyr. Sondai-aq olar qylmystyq isterdiń tergelý barysyn tekserip, kúdiktilerdiń nelikten bosatylǵanyna quqyqtyq baǵa berýdi surady.
