«Qazaqstan temir joly» ulttyq kompaniiasy basshylyǵynyń ustalýyna bailanysty oqiǵalardan keiin jumys rejimine qatysty málimdeme jasady. Kompaniia jolaýshylar men júk poiyzdarynyń qozǵalysy tolyq kólemde qamtamasyz etilip jatqanyn málimdedi, dep habarlaidy dalanews.kz.
QTJ málimetinshe, tasymaldaý protsesi úzdiksiz júzege asyrylyp jatyr. Poiyzdar qozǵalysynyń qaýipsizdigi men kesteniń oryndalýy turaqty baqylaýda. Kompaniia jolaýshylar men klientter aldyndaǵy barlyq mindettemesin tolyq kólemde oryndap jatqanyn málimdedi.
Eske salaiyq, 12 qarashada Ulttyq qaýipsizdik komiteti «Samuryq-Qazyna» AQ basqarma tóraǵasy Nurlan Jaqypov pen «Qazaqstan temir joly» UK» AQ basqarma tóraǵasy Eljas Otynshievtiń ustalǵanyn rastady. Vedomstvonyń habarlaýynsha, olar 11 qarashada sybailas jemqorlyq qylmysyn jasady degen kúdikpen ustalǵan. Is boiynsha ózge de adamdar bar. Qazir tergeý amaldary júrgizilip jatyr.
Osydan keiin «Samuryq-Qazyna» qory da resmi málimdeme jasap, qor men onyń tobyna kiretin kompaniialar shtattyq rejimde jumys istep jatqanyn habarlady. Qor investorlar, kreditorlar jáne iskerlik seriktester aldyndaǵy mindettemelerdiń ózgerissiz qalatynyn, investitsiialyq jobalar men strategiialyq baǵdarlamalar bekitilgen josparǵa sáikes jalǵasatynyn málimdedi.
Sonymen qatar 13 qarashada Prezident Qasym-Jomart Toqaevtyń tóraǵalyǵymen kólik-logistika salasyn damytý máselelerine arnalǵan Qaýipsizdik keńesiniń shuǵyl otyrysy ótedi. Jiynda Memleket basshysy ulttyq kompaniialar basshylarynyń ustalýyna bailanysty memlekettiń ustanymyn jetkizip, zańdylyq pen ashyqtyqty qamtamasyz etý jáne basshylardyń jeke jaýapkershiligi máselelerine nazar aýdarady.
