Qazaqstan musylmandary dini basqarmasy kúndelikti qoldanystaǵy keibir arab sózderin qazaqsha balamalarymen almastyrýdy usyndy. Osyǵan bailanysty dini basqarma qazaq tilinde qoldanýǵa bolatyn sózderdiń tizimin jariialady, dep habarlaidy dalanews.kz.
Bul usynys Memleket basshysynyń burynnan kele jatqan qazaqy sózder men tirkesterdiń ornyna arab tilindegi sózderdi qoldaný máselesine qatysty aitqan pikirinen keiin kóterildi.
Alaida bul bastama sheteldik sózderdi qoldanýǵa tyiym salýdy kózdemeidi. Dini basqarmanyń usynystary tek kúndelikti qarym-qatynasta qazaq tilindegi qalyptasqan sózderdi kóbirek qoldanýǵa baǵyttalǵan. Al dini qulshylyq kezinde arab tilindegi sózder burynǵydai saqtalady.
Máselen, QMDB «iftar» sóziniń ornyna «aýyzashar», al «sýhýr» sóziniń ornyna «sáresi» ataýyn qoldanýǵa keńes beredi.
Sondai-aq «ahi», «ýhti», «abla», «abi» degen qaratpa sózderdi jáne «brat», «sestra» ataýlaryn qazaqsha balamalarymen almastyrý usynylǵan. Olardyń ornyna «baýyrym», «aǵam», «inim», «ápkem», «apam», «qaryndasym» degen sózderdi qoldanýǵa bolady.
Dini basqarmanyń pikirinshe, mundai usynystar kúndelikti tilde qazaqy sózderdiń qoldanysyn keńeitýge múmkindik beredi.
