"Habar" agenttigi mýltimedialyq jáne teleradio habarlaryn taratýǵa arnalǵan jabdyqtardy qarjylai lizing arqyly satyp alýdy josparlap otyr. Memlekettik satyp alý portalyndaǵy lottyń jalpy quny 228 mln teńgege baǵalanǵan, dep habarlaidy dalanews.kz.
Goszakupturaly derekkóziniń málimetinshe, ádette lizing tetigi politsiia men tótenshe jaǵdailar qyzmetine qajetti kólikterdi, avtobýstardy, meditsinalyq jabdyqtardy nemese orman órtin erte anyqtaý júieleri sekildi qymbat keshenderdi alý kezinde qoldanylady. Al bul joly tapsyrys berýshi televiziialyq óndiris pen habar taratýǵa qajetti tehnikany tańdaǵan.
"Satyp alynatyn jabdyqtardyń qatarynda Dell Pro Max Tower T2 Desktop jumys stantsiialary, HP Z8 G5 jáne Nvidia RTX 6000 negizindegi serverler, sondai-aq Apple Mac Studio M5 Ultra kompiýterleri bar. Tizimde budan bólek te birqatar mýltimedialyq qurylǵy kórsetilgen", - deidi derekkóz.
Tehnikany nelikten tikelei satyp almai, lizingke rásimdeý týraly sheshim qabyldanǵany ázirge belgisiz. Munyń bir sebebi satyp alý qujattarynda qajetti taýarlardyń naqty markasy men modelin kórsetý múmkindigine bailanysty bolýy múmkin. Óitkeni memlekettik satyp alýda brendti dál ataýǵa kóbine qoldanystaǵy jabdyqty tolyqtyrý kezinde nemese lizing rásimdelgen jaǵdaida ǵana jol beriledi.
"Qujattaǵy baǵalar da nazar aýdartady. Máselen, bir Apple Mac Studio M5 Ultra kompiýteriniń shekti quny 11 551 724 teńge 14 tiyn dep belgilengen. AQSh naryǵynda mundai qurylǵylardyń baǵasy shamamen 6 myń dollardan bastalady. Árine, Qazaqstandaǵy jetkizý, salyq, kepildik qyzmeti men naryq erekshelikteri baǵaǵa áser etýi múmkin. Degenmen ár pozitsiia qunynyń tiynyna deiin eseptelýi bul somalardyń qalai qalyptasqanyna qatysty suraq týǵyzady", - dep tolyqtyrdy arna.
Endigi másele - lizing qyzmetin qai uiym kórsetetini. Derekkózdiń jazýynsha, memlekettik mekemeler ótkizetin mundai konkýrstarda Ónerkásipti damytý qory jii jeńimpaz atanady.
"Eger bul satyp alýda da atalǵan qor jeńiske jetse, memlekettik lizing tájiribesindegi erekshe jaǵdailardyń biri bolmaq", – dep jazady GoszakupTuraly.
Ázirge konkýrs qorytyndysy shyqpady. Apple kompiýterleri men habar taratý jabdyqtaryn lizingke beretin kompaniia satyp alý aiaqtalǵannan keiin belgili bolady.
