Qazaqstanda kásipkerler men iri investitsiialyq jobalardy qarjylandyrýǵa zeinetaqy aktivterin keńinen tartý usynyldy. Qarjy naryǵyn retteý jáne damytý agenttiginiń tóraǵasy Mádina Ábilqasymovanyń pikirinshe, bul úshin BJZQ qarajatyn bankterge berý tártibin jetildirý qajet, dep habarlaidy dalanews.kz.
Ol Qazaqstan qarjygerleriniń XIV kongresinde ekinshi deńgeili bankter uzaqmerzimdi qarjylandyrýǵa belsendirek aralasýy keregin aitty. Ásirese qurylys júrgizý, infraqurylymdy jańartý jáne kásiporyndardy damytýǵa arnalǵan jobalarǵa basymdyq berý usynylyp otyr.
"Ulttyq bankpen birge bankterdiń biznes pen infraqurylymdyq jobalardy nesieleý múmkindigin keńeitetin qosymsha sharalar ázirlep jatyrmyz", – dedi agenttik tóraǵasy.
Qazir zeinetaqy qorynyń aktivteri ekonomikanyń jekelegen salalaryn qarjylandyrýǵa paidalanylyp keledi. Alaida qoldanystaǵy sharttar bankterdiń bul qarajatty naqty sektorǵa belsendi baǵyttaýyna jetkilikti ynta bermeidi. Sondyqtan baǵdarlama talaptaryn qaita qarap, qarjy uiymdary úshin tiimdi tetik qalyptastyrý kózdelgen.
Ábilqasymova jeńildetilgen nesielerdiń paiyzdyq mólsherlemesin «Damý» qory arqyly sýbsidiialaýdy jalǵastyrý qajet dep esepteidi. Biraq memleket kómegi kez kelgen bastamaǵa emes, el ekonomikasyna naqty serpin beretin investitsiialyq jobalarǵa berilýi tiis.
"Sýbsidiialaý saqtalýy kerek. Degenmen memlekettik qoldaý basym investitsiialyq jobalarǵa shoǵyrlanǵany jón", – dedi ol.
