"QazTransOil" 2026 jyldyń alǵashqy on aiynda 38 mln 306 myń tonna munai tasymaldady. Bul byltyrǵy sáikes kezeńmen salystyrǵanda 1 mln 323 myń tonnaǵa kóp, dep habarlaidy dalanews.kz.
Protenge derekkóziniń málimetinshe, kórsetkishtiń aitarlyqtai ósýine birneshe faktor áser etýi múmkin. Sonyń biri – byltyr dron shabýyldarynan keiin buzylǵan infraqurylymnyń qalpyna kelýi. 2025 jyly, ásirese Kaspii qubyr konsortsiýmynyń nysandaryna jasalǵan shabýyldar tasymal kólemine keri áser etip, munai aǵynyn basqa baǵyttarǵa burýǵa májbúr etken edi. Biyl birqatar baǵyttyń qalypty jumysyna qaita oralýy jalpy kórsetkishti arttyrǵan bolýy yqtimal.
Muny Kaspii qubyr konsortsiýmy júiesine jóneltilgen munai kóleminen de baiqaýǵa bolady. Atalǵan baǵyttaǵy tasymal 897 myń tonnaǵa ósip, 3 mln 878 myń tonnaǵa jetken. Byltyr dron shabýyldarynan eń kóp zardap shekken baǵyttardyń biri de osy bolatyn. Demek, infraqurylym qalpyna kelgennen keiin munai aǵyny qaita jandanyp, kórsetkishte aitarlyqtai ósim qalyptasqan.
Degenmen «QazTransOil» resmi habarlamasynda tasymal kóleminiń artýyn dron shabýyldarynan keiingi qalpyna kelý úderisimen tikelei bailanystyrmaidy. Kompaniia tek óndiristik kórsetkishterdiń ózgerisin keltirgen.
Buǵan qosa, 2026 jylǵy qarashada dron shabýylyna bailanysty «Atyraý – Samara» munai qubyry arqyly tasymal ýaqytsha toqtaǵany habarlandy. Alaida qubyr jumysy kóp uzamai qaita jandandy.
Ósimge ishki naryqtaǵy suranys ta yqpal etken. Qazaqstandaǵy munai óńdeý zaýyttaryna jetkizilgen shikizat kólemi 643 myń tonnaǵa kóbeiip, 15 mln 522 myń tonnaǵa jetti.
Al «Tuimazy – Omby – Novosibir-2» munai qubyry arqyly tasymaldanǵan munai kólemi 450 myń tonnaǵa artyp, 10 mln 214 myń tonnany qurady.
