Qazaqstanda atom elektr stantsiiasynyń qurylysyna bailanysty Almaty oblysyndaǵy Úlken kentin keshendi damytý josparlanyp otyr. Joba aiasynda 33 myń adamǵa deiin turatyn atomshylar qalashyǵy boi kóteredi. Bul týraly Atom energiiasy agenttiginiń tóraǵasy Almasadam Sátqaliev Túrkiiadaǵy «Akkýiý» AES-inde jumys isteitin qazaqstandyq mamandarmen kezdesýde málimdedi, dep habarlaidy dalanews.kz.
Úlkende qandai nysandar salynady?
Almasadam Sátqalievtiń aitýynsha, atomshylar qalashyǵy qazirgi Úlken kentiniń quramyna biriktiriledi. Jeke jumysshylar poselkesin salý kózdelmegen. Onyń ornyna eldi mekenniń ózi turǵyn úi jáne áleýmettik infraqurylymmen birge damytylady.
Jospar boiynsha, munda:
- turǵyn úiler;
- mektepter;
- meditsinalyq nysandar;
- mamandardy daiarlaý jáne qaita daiarlaý ortalyqtary;
- qonaqúiler;
- qyzmet kórsetý jáne biznes nysandary salynady.
«Bul jeke jumysshylar kenti bolmaidy. Bul – ómir súrýge qajetti barlyq ilespe infraqurylymy bar Úlken kentin damytý jobasy», – dep atap ótti Almasadam Sátqaliev.
Sonymen qatar AES qurylysyn qamtamasyz etý úshin salynatyn nysandardy keiin de paidalaný máselesi eskeriledi. Qurylys aiaqtalǵan soń olardyń bir bóligi kenttiń qajetine jarap, kásipkerlikti damytýǵa múmkindik bermek.
Úlken Balqash jaǵasyndaǵy zamanaýi kentke ainalmaq
Atom energiiasy agenttiginiń basshysy Úlkende zamanaýi tsifrlyq sheshimder engiziletinin aitty. Onyń sózinshe, kent Balqash jaǵalaýyndaǵy eń ozyq eldi mekenderdiń birine ainalýy múmkin.
Kenttiń tabiǵi landshafty men ornalasýy demalys jáne týrizm salasyn damytýǵa da múmkindik beredi.
Budan bólek, bolashaq atom elektr stantsiiasynyń qyzmetkerlerin daiarlaý, qaita daiarlaý jáne biliktiligin arttyrý úshin oqý-jattyǵý ortalyǵyn ornalastyrý josparlanǵan.
AES qurylysyna 15 myńǵa deiin maman qajet
Almasadam Sátqalievtiń málimetinshe, atom elektr stantsiiasynyń qurylysy sharyqtaý shegine jetken kezde bir nysanǵa 15 myńǵa deiin jumysshy qajet bolady.
Olardyń qatarynda:
- injener-qurylysshylar;
- dánekerleýshiler;
- montajshylar;
- elektrikter;
- avtomattandyrý jáne sapany baqylaý mamandary bar.
Al stantsiia paidalanýǵa berilgennen keiin onyń turaqty jumysyna shamamen 2 myń qyzmetker qajet bolady. Olardyń arasynda atom injenerleri, reaktor qondyrǵylarynyń operatorlary, iadrolyq jáne radiatsiialyq qaýipsizdik mamandary, jabdyqtarǵa tehnikalyq qyzmet kórsetý jáne jóndeý qyzmetkerleri bolady.
Bolashaq atomshylar qaida oqidy?
Mamandardy daiarlaý Qazaqstannyń beiindi oqý oryndarymen qatar Qytai men Reseidiń mamandandyrylǵan bilim berý uiymdarymen yntymaqtastyq aiasynda júrgiziledi.
Sondai-aq atom salasynyń qyzmetkerlerine «Bolashaq» halyqaralyq stipendiialyq baǵdarlamasy arqyly bilim alý múmkindigi qarastyrylǵan. Baǵdarlama aiasynda magistratýra men doktorantýrada oqý, sondai-aq sheteldiń jetekshi atom salasy uiymdarynda taǵylymdamadan ótý úshin arnaiy kvotalar bólinýi múmkin.
Almasadam Sátqaliev Úlkendi damytý jergilikti jastarǵa jańa jumys oryndary men mansaptyq múmkindikter ashatynyn atap ótti. Sonymen qatar ol bolashaq mamandardyń baspanamen qamtamasyz etiletinin aitty.
