Qaraǵandy oblysynda kámeletke tolmaǵan qyzdy top bolyp zorlaǵan bes jasóspirim 5 jyl 7 ai 15 kúnge bas bostandyǵynan aiyryldy. Sottalýshylardyń barlyǵy qylmys jasalǵan kezde kámeletke tolmaǵan bolǵan. Bul týraly Qaraǵandy oblysynyń qylmystyq ister jónindegi mamandandyrylǵan aýdanaralyq soty habarlady, dep habarlaidy dalanews.kz.
Oqiǵa qalai bolǵan?
Sot materialdaryna sáikes, oqiǵa 2025 jylǵy 14 aqpanda bolǵan. Sol kúni kámeletke tolmaǵan jábirlenýshi qurbysymen birge jasyn jasyryp, «Infiniti» túngi karaoke-klýbyna kirgen. Qyzdar onda úsh saǵattan astam ýaqyt boiy alkogoldik ishimdik ishken. Qatty mas bolǵandyqtan úiine osy kúide qaitýǵa qoryqqan qyzdar tanysy I.-diń usynysymen onyń kámeletke tolmaǵan dostarynyń páterine barǵan.
Sot páterde S. esimdi sottalýshy jábirlenýshiniń esin jiǵyzbaý úshin oǵan himiialyq zattyń býyn iisketkeni anyqtaldy. Osydan keiin bes jasóspirim qyzdyń dármensiz jaǵdaiyn paidalanyp, top bolyp zorlaǵan. Sotta olardyń kinási jábirlenýshi men kýágerlerdiń jaýaptary, saraptama qorytyndylary jáne qylmystyq istiń basqa da materialdary arqyly dáleldengen.
Prokýror 7,5 jyl surady, qorǵaýshylar aqtaýdy talap etti
Memlekettik aiyptaýshy bes sottalýshynyń árqaisysyn 7 jyl 6 aiǵa bas bostandyǵynan aiyrýdy jáne eki jyl boiy pedagogikalyq qyzmetpen ainalysýyna tyiym salýdy suraǵan. Sonymen qatar 2025 jylǵy 23 maýsymdaǵy raqymshylyq týraly zańdy qoldanyp, jaza merzimin 5 jyl 7 ai 15 kúnge deiin qysqartýdy usynǵan.
Jábirlenýshi tarap prokýrordyń ustanymyn qoldap, moraldyq ziian úshin 100 mln teńge ótemaqy óndirýdi talap etken. Al qorǵaýshylar sottalýshylardyń kinási dáleldenbegenin aityp, barlyǵyn aqtaýdy suraǵan.
Bes jasóspirim qandai jaza aldy?
Qazaqstan Qylmystyq kodeksiniń 120-baby 3-bóliginiń 1-1-tarmaǵynda kózdelgen qylmys úshin 15 jyldan 17 jylǵa deiin bas bostandyǵynan aiyrý nemese ómir boiyna bas bostandyǵynan aiyrý jazasy qarastyrylǵan. Alaida sottalýshylardyń qylmys jasaǵan kezdegi kámeletke tolmaǵan jasyn jaýaptylyq pen jazany jeńildetetin mán-jai retinde tanyǵan. Aýyrlatatyn mán-jailar anyqtalmaǵan. Sot zań talaptaryna sáikes kámeletke tolmaǵandarǵa 7 jyl 6 aidan artyq jaza taǵaiyndaýǵa bolmaitynyn eskergen.
Nátijesinde bes jasóspirimniń árqaisysyna bastapqyda 7 jyl 6 ai bas bostandyǵynan aiyrý jazasy taǵaiyndalyp, raqymshylyq zańyna sáikes merzim 5 jyl 7 ai 15 kúnge qysqartylǵan. Sondai-aq olardyń eki jyl boiy pedagogikalyq qyzmetpen ainalysýyna tyiym salyndy.
Jábirlenýshiniń 100 mln teńge kólemindegi moraldyq ótemaqy týraly talaby ishinara qanaǵattandyryldy. Sot bes sottalýshydan ortaq tártippen 10 mln teńge óndirip alý týraly sheshim shyǵardy. Sot úkimi ázirge zańdy kúshine engen joq.
