Qazaqstandyq jýrnalist Aleksandra Alehovaǵa qatysty apelliatsiialyq sot úkimdi jeńildetti. Sot onyń bas bostandyǵynan aiyrý merzimin bir jylǵa qysqartyp, jýrnalistik qyzmetpen ainalysýǵa salynǵan tyiymdy alyp tastady, dep habarlaidy dalanews.kz.
Buǵan deiin birinshi satydaǵy sot jýrnalisti úsh jylǵa bas bostandyǵynan aiyryp, jazany bes jylǵa keiinge qaldyrǵan. Sonymen qatar oǵan úsh jyl boiy jýrnalistikamen ainalysýǵa tyiym salǵan edi.
Jýrnalistiń jaza merzimi qysqartyldy
Apelliatsiialyq alqa raqymshylyq jasaý týraly zańdy eskerip, bas bostandyǵynan aiyrý merzimin úsh jyldan eki jylǵa deiin qysqartqan. Sondai-aq jazany oryndaýdy keiinge qaldyrý merzimi qaita qaraldy. Endi ol tórt jyl, 10 ai jáne 20 kúnge belgilendi. Iaǵni jaza 2031 jylǵy 2 qazanǵa deiin keiinge shegerildi. Bul ýaqytta jýrnalistiń uly 14 jasqa tolady.
Birinshi satydaǵy sot jazany bes jylǵa keiinge qaldyrǵan bolatyn. Apelliatsiialyq sot bul merzimdi balanyń jasyna qatysty zań talaptaryna sáikestendirdi.
Alehova jýrnalistikamen ainalysa alady
Apelliatsiialyq sot jýrnalistiń úsh jyl boiy kásibi qyzmetpen ainalysýyna salynǵan tyiymdy alyp tastady. Sot mundai sheshimdi jýrnalistika Alehovanyń negizgi tabys kózi ekenimen túsindirgen. Sondyqtan ony kásibinen aiyrý jáne balasyn asyraý múmkindigin shekteý orynsyz dep tanylǵan.
Sonymen qatar zardap shekkenderge ótemaqy tóleý qoryna aýdarylatyn qarajat mólsheri de ózgertildi. Soma qylmys jasalǵan kezdegi ailyq eseptik kórsetkishke sáikes eseptelip, 20 AEK nemese 68 261 teńge bolyp belgilendi.
Aiyptaý úkimi kúshinde qaldy
Apelliatsiialyq alqa jýrnalisti aqtaýǵa negiz tappaǵan. Sondyqtan oǵan Qazaqstan Qylmystyq kodeksiniń 147-baby 5-bóligi, iaǵni jeke ómirge qol suǵylmaýshylyqty buzý boiynsha shyǵarylǵan aiyptaý úkimi ózgerissiz qaldy. Aita keteiik, Elena Sadvakasovanyń aryzy boiynsha qozǵalǵan qylmystyq is 2022 jyldan beri jalǵasyp keledi. Ol kezde is toqtatylǵanymen, keiin qaita jandanǵan. Osy aryz negizinde buǵan deiin taǵy bir jýrnalist Oleg Gýsev te úsh jylǵa shartty túrde sottalǵan.
Apelliatsiialyq sottyń qaýlysy zańdy kúshine endi.
Alaida jýrnalist jazany keiinge qaldyrý kezeńinde qoǵamdyq tártipti buzsa nemese balasyn tárbieleý mindetterinen jaltarsa, shartty jaza naqty bas bostandyǵynan aiyrý jazasyna aýystyrylýy múmkin. Mundai jaǵdaida ol ortasha qaýipsizdik mekemesine jiberilýi yqtimal.
Sot úkiminiń jeńildetilýi istiń zańdylyǵy týraly suraqtardy tolyq sheshpeidi. Bul máselege qatysty advokat Gúlnar Súleimenovamen suhbatta da pikir aitylǵan.
