Qazaqstanda sottalǵandardy azyq-túlikpen qamtamasyz etýge jaýapty «Eńbek» respýblikalyq memlekettik kásipornynyń basshylaryna qatysty sotqa deiingi tergep-tekserý júrgizilip jatyr, dep habarlaidy dalanews.kz.
«Sotqa deiingi tergep-tekserý júrgizilip jatqanyn habarlaimyz. Qylmystyq-protsestik kodekstiń 201-babynyń 1-bóligine sáikes, ózge aqparat jariia etýge jatpaidy», - delingen UQK-niń resmi jaýabynda.
Buǵan deiin taraǵan aqparatqa sáikes, UQK-niń Sybailas jemqorlyqqa qarsy is-qimyl qyzmeti «Eńbek» RMK bas direktory Ermek Shurmanov pen kásiporynnyń azyq-túlik basqarmasynyń basshysy Fýrkat Hýdaibergenovti ustaǵan. Olar sottalǵandarǵa arnalǵan azyq-túlik ónimderin satyp alý jáne jetkizý kezinde sybailas jemqorlyq sipatyndaǵy qylmystarǵa kúdikti dep kórsetilgen.
Aqparat kózderiniń málimetinshe, basshylar qyzmettik kabinetinde ustalǵan. Sondai-aq Ermek Shurmanov Ishki ister ministri Erjan Sádenov qyzmetine kirisken kezeńde bas direktor bolyp taǵaiyndalǵany aitylǵan.
Osydan keiin qylmystyq-atqarý júiesi mekemelerin azyq-túlikpen qamtamasyz etý tártibi ózgergeni týraly málimet tarady. Buryn segiz jetkizýshi ainalysqan jumysty keiin búkil Qazaqstan boiynsha bir uiymǵa shoǵyrlandyrǵany aitylǵan. Alaida bul aqparatqa qatysty resmi túsinikteme ázirge jariialanǵan joq.
Buǵan deiin Qazaqstan koloniialaryndaǵy sottalǵandardy tamaqtandyrý máselesi de kóterilgen. Aqparat kózderiniń habarlaýynsha, mekemelerge azyq-túlik jetkizýdegi úzilister sybailas jemqorlyqqa qarsy qyzmettiń nazaryn aýdarǵan.
Sonymen qatar azyq-túlik jetkizýdi ortalyqtandyrý týraly sheshimdi kim qabyldaǵany jáne bul protseste Ishki ister ministrligi basshylyǵynyń qandai ról atqarǵany jóninde suraqtar týyndap otyr.
