Ortalyq Aziia elderiniń memlekettik júielerine shabýyl jasap, qupiia qujattardy urlaǵan Silent Lynx hakerlik toby óz serverine qosylý úshin «Qazaqtelekom» internetin paidalanǵan. Bul týraly halyqaralyq kiberqaýipsizdik kompaniiasy CloudSEK júrgizgen zertteýde aitylǵan, dep habarlaidy dalanews.kz.
11 qarashada jariialanǵan zertteý barysynda mamandar hakerler tobynyń qorǵalmaǵan serverin anyqtaǵan. Onda ziiandy baǵdarlamalar, urlanǵan qujattar jáne jasandy intellektpen júrgizilgen hat almasýlar saqtalǵan.
Hakerler «Qazaqtelekom» jelisine qalai qosylǵan?
CloudSEK mamandarynyń anyqtaýynsha, hakerler ózderiniń internettegi áreketterin kóbine Tor anonimdi jelisi arqyly jasyrǵan. Alaida olar birneshe ret «Qazaqtelekom» men Qazaqstandaǵy taǵy bir internet-provaiderdiń úi interneti arqyly óz serverine qosylǵan. Mysaly, 2 qazanda hakerlerdiń biri aldymen «Qazaqtelekom» jelisi arqyly serverge kirip, tórt minýttan keiin Proton VPN qyzmetin paidalanǵan.
Zertteýshiler kibershabýyl jasaýshylardyń belsendiligi Qazaqstandaǵy jumys ýaqytyna sáikes keletinin de anyqtaǵan. Olardyń serverge qosylýy kóbine saǵat 08:00-den 20:00-ge deiingi aralyqta bolǵan. Bul rette CloudSEK «Qazaqtelekomdy» kibershabýyldarǵa qatysy bar dep aiyptamaidy. Áńgime kompaniianyń internet jelisin hakerlerdiń paidalanǵany týraly bolyp otyr.
Hakerler Tájikstannyń áskeri qujattaryn urlaǵan
CloudSEK dereginshe, Silent Lynx toby Ortalyq Aziia elderine qarsy kibershpionajben ainalysqan. Tájikstanda hakerler ulttyq temirjol jelisin buzyp kirgen. Olar 2026 jyldyń tamyz aiynyń ortasynan kem degende 10 qazanǵa deiin júiege qol jetkizip otyrǵan.
Ziiankester ishki serverlerge, qyzmettik hat almasýlar men jumys qujattaryna qol jetkizgen. Temirjol qyzmetkeriniń eseptik jazbasyn paidalanyp, memlekettik elektrondyq qujat ainalymy júiesine de kirgen. Nátijesinde Tájikstan Qorǵanys ministrligine qatysty 2 myńnan astam qujatty urlaǵan. Olardyń arasynda áskeri taǵaiyndaýlar, jeke quramnyń qozǵalysy, qorǵanys salasyndaǵy satyp alýlar jáne halyqaralyq áskeri yntymaqtastyq týraly málimetter bolǵan.
Sonymen qatar hakerler Ulttyq ulanǵa, Memlekettik ulttyq qaýipsizdik komitetine jáne Investitsiialar jónindegi memlekettik komitetke qatysty qujattarǵa qol jetkizgen. Ózbekstanda hakerler orman resýrstaryn basqarýǵa arnalǵan Smart Forestry memlekettik platformasyna kirip, onyń derekter bazasyn tolyq baqylaýyna alǵan.
Túrikmenstanda top eldiń temirjol ákimshiligi men Ahal ýálaiaty ákimshiliginiń atynan jasalǵan jalǵan qujattardy paidalanyp, kibershabýyldarǵa daiyndalǵan. Alaida bul uiymdarǵa sátti shabýyl jasalǵany týraly dálel tabylmaǵan.
Budan bólek, zertteýshiler Pákistan Syrtqy ister ministrligi men eldiń ulttyq telekommýnikatsiia operatoryna shabýyl jasaý áreketteriniń izderin anyqtaǵan.
Hakerler DeepSeek jasandy intellektisin paidalanǵan
Zertteý barysynda hakerlerdiń shabýyl kezinde DeepSeek jasandy intellektisin qoldanǵany da belgili boldy. Olar ony buzylǵan júielerdi zertteý, qujattardy jinaý jáne óz áreketteriniń izderin joiý úshin paidalanǵan. Jasandy intellektini basqarý Telegram jelisindegi «Marat» esimdi akkaýnt arqyly júzege asyrylǵan. Alaida onyń artynda turǵan adamnyń kim ekeni ázirge belgisiz.
Zertteýshiler hakerlik toptyń operatory Qazaqstanmen bailanysty bolýy múmkin dep boljaidy. Degenmen onyń azamattyǵyn anyqtaý múmkin bolmaǵan. CloudSEK jariialaǵan zertteýde «Qazaqtelekomnyń» kibershabýyldarǵa qatysy bary týraly aitylmaidy. Mamandar tek hakerler tobynyń kompaniia internetin óz serverine qosylý úshin paidalanǵanyn anyqtaǵan.
