Túrkiianyń Ystanbul qalasynda 35 jastaǵy Qyrǵyzstan azamaty Aijibek Nýrgazy qyzy adam qolynan qaza tapty. Qylmysqa kúdikti retinde taǵy bir qyrǵyzstandyq áiel ustaldy, dep dalanews.kz tilshisi BBC-diń qyrǵyz qyzmetine silteme jasap habarlaidy.
Qaiǵyly oqiǵa 5 qarasha kúni Ystanbuldyń Aqsarai aýdanynda bolǵan. Qyrǵyzstannyń Bas konsýldyǵy eki azamattyń arasynda janjal týyndap, onyń sońy adam ólimine ákelgenin rastady. Marqumnyń týǵan inisi Aidarbek Nýrgazievtiń aitýynsha, ápkesi Túrkiiaǵa osydan eki ai buryn ǵana qaita oralǵan.
"Ápkem Aijibek Nýrgazy qyzy 5 qarasha kúni tańerteń qaitys bolypty. Biz bul habardy Qyrǵyzstan ýaqytymen keshki saǵat 17:00 shamasynda estidik. Ápkem 35 jasta edi. Túrkiiaǵa ketkenine eki ai ǵana bolǵan. 23 tamyzda ózim shyǵaryp salǵan edim", – dedi ol.
Aidarbektiń sózinshe, ápkesi buǵan deiin Túrkiiada shamamen on jyl jumys istegen. Keiin Qyrǵyzstanǵa oralyp, birneshe jyl týǵan elinde turǵan. Biyl tamyz aiynda qaitadan Ystanbulǵa jumys isteýge ketken.
Marqumnyń týystary janjaldyń neden bastalǵanyn da aityp berdi. Aidarbek Nýrgazievtiń málimetinshe, ápkesi Ystanbuldaǵy "312" dep atalatyn salonda jumys istegen. Ol salon iesiniń páterinde ýaqytsha turýǵa ruqsat alǵan.
Qaiǵyly oqiǵa bolǵan kúni Aijibek uiyqtap jatqanda bólmege basqa áiel kirip, telefonmen qatty sóilese bastaǵan. Aijibek erteńine jumysqa barýy kerektigin aityp, odan tynyshtyq saqtaýyn ótingen.
"Ápkem erteń jumysqa baratynyn aityp, aqyryn sóileýin suraǵan. Álgi áiel bólmeden shyǵyp ketip, keiin pyshaqpen qaita oralyp, ápkemniń júregine suǵypty. Betinen de tepkilegen. Bizde bolǵan oqiǵanyń beinejazbalary bar", – dedi marqumnyń inisi.
Bul – marqumnyń týysy baiandaǵan oqiǵa nusqasy. Janjaldyń tolyq mán-jaiy tergeý barysynda anyqtalady.
Qyrǵyzstannyń Ystanbuldaǵy Bas konsýldyǵy oqiǵaǵa qatysty resmi málimdeme jasady.
"2026 jylǵy 5 qarashada Ystanbul qalasynyń Aqsarai aýdanynda Qyrǵyz Respýblikasynyń eki azamaty arasynda janjal týyndap, sonyń saldarynan 1991 jyly týǵan A.N. esimdi azamat pyshaq jaraqatynan qaitys boldy. Qylmysqa kúdikti retinde 1994 jyly týǵan V.S. esimdi azamat ustaldy", – delingen habarlamada.
Diplomatiialyq ókildik atalǵan istiń baqylaýda ekenin málimdedi. Qazirgi ýaqytta Túrkiianyń quqyq qorǵaý organdary tergeý júrgizip jatyr.
