Saýd Arabiiasynyń astanasy Er-Riiadta iemendik hýsitterdiń zymyran shabýyly saldarynan memlekettik Saudi Aramco munai kompaniiasynyń záýlim ǵimaraty búlindi. Oqiǵa 8 qarashada korol Abdalla atyndaǵy qarjy aýdanynda (KAFD) bolǵan, dep habarlaidy dalanews.kz.
Reuters agenttiginiń habarlaýynsha, shabýyldan keiin ǵimarattyń birneshe qabatyndaǵy terezeler synǵan. Saýd Arabiiasynyń Energetika ministrligi ǵimarattyń zaqymdanǵanyn rastady. Alaida vedomstvo muny shabýylǵa toitarys berý kezinde qulaǵan zymyran synyqtarynan bolǵan bolmashy zaqym dep túsindirdi.
Ministrliktiń málimetinshe, oqiǵadan qaza tapqandar men zardap shekkender joq.
Zaqymdanǵan ǵimarattyń videosyn ConflictRadarME OSINT jobasy jariialaǵanymen, keiin jazba qoljetimsiz bolyp qalǵan. Kadrlardy MenchOSINT jobasy da taratyp, keiin Middle East Eye basylymy jariialady. Videodan ǵimarattyń qasbeti búlingenin, terezeleri synǵanyn jáne zaqymdanǵan bóliginen tútin kóterilgenin kórýge bolady. Áleýmettik jelilerde ǵimarattyń birneshe qabatyna kelgen zaqymdy kórsetetin fotosýretter de tarady.
Saýd Arabiiasy bastaǵan áskeri koalitsiia buǵan deiin hýsitter Er-Riiad baǵytyna ushyrǵan eki ballistikalyq zymyrannyń jolyn keskenin málimdegen. Keiin áskeri kúshter astana men eldiń ońtústik aimaqtaryna baǵyttalǵan taǵy eki qanatty zymyrannyń joiylǵanyn habarlady.
AFP agenttiginiń málimetinshe, birneshe kýáger záýlim ǵimarattyń zaqymdanǵanyn rastaǵan. Olardyń biri ǵimarattyń birneshe qabaty, sonyń ishinde shyny qasbeti búlingenin aitqan.
«Ansar Alla» hýsitter qozǵalysynyń áskeri ókili Iahia Saria toptyń Er-Riiadtaǵy qarjy ortalyǵy men Saýd Arabiiasynyń shyǵysyndaǵy Abkaik qalasynda ornalasqan Saudi Aramco nysandaryna soqqy bergenin málimdedi. Bul týraly TASS habarlady.
Sarianyń aitýynsha, Abkaiktegi shabýyldan keiin munai nysandarynda órt shyqqan. Alaida bul aqparat ázirge táýelsiz derekkózder arqyly rastalǵan joq. Hýsitter sonymen qatar Iemenniń birneshe provintsiiasynda Saýd Arabiiasy bastaǵan koalitsiia kúshterine soqqy jasaǵanyn málimdedi.
Aita keteiik, qazan aiynda hýsitter Saýd Arabiiasynyń shyǵysyndaǵy Dahran qalasynda ornalasqan Saudi Aramco kompaniiasynyń bas keńsesine de shabýyl jasaǵan. 13 qazanda zymyran keshendegi ǵimarattardyń birine tiip, onyń joǵarǵy úsh qabatyn zaqymdaǵan.
Ol kezde Saýd Arabiiasynyń biligi bastapqyda ǵimaratqa áýe shabýylyna qarsy qorǵanys júiesi atyp túsirgen zymyrannyń synyqtary qulaǵanyn habarlaǵan. Alaida Reuters agenttiginiń kompaniiadaǵy derekkózi ǵimaratqa ballistikalyq zymyran tikelei tigenin rastaǵan.
