AQSh qor naryǵy 5 qarashada kúrt tómendedi. Nasdaq Composite indeksi 5,5 paiyzǵa, S&P 500 – 4,4 paiyzǵa, al Dow Jones 3,4 paiyzǵa quldyrady. Buǵan jasandy intellekt salasyndaǵy kompaniialardyń aktsiialary jappai satylymǵa túsýi sebep boldy. Investorlar data-ortalyqtar qurylysyna qoiylýy múmkin shekteýler men aýqymdy investitsiialardyń ózin-ózi aqtaý merzimine alańdap otyr, dep habarlaidy dalanews.kz.
5 qarashadaǵy saýda qorytyndysy boiynsha AQSh-tyń negizgi qor indeksteri 2025 jylǵy sáýirden bergi eń úlken bir kúndik quldyraýdy kórsetti. Aldymen tehnologiialyq kompaniialardyń aktsiialary arzandap, keiin satylym búkil naryqqa tarady. Osylaisha, aldyńǵy saýda kúnindegi ósim tolyqtai derlik joiyldy.
Nasdaq Composite indeksi 24 315 pýnktke deiin tómendep, sońǵy sharyqtaý sheginen 10 paiyzdan astamǵa arzandady. Osylaisha, indeks naryqtaǵy túzetý kezeńine ótti. Al S&P 500 shamamen 7 354 pýnktti, Dow Jones 51 523 pýnktti qurady. Soǵan qaramastan, úsh indeks te jyl basyndaǵy deńgeiinen joǵary qalyp otyr.
Oninvest málimetinshe, Nasdaq birjasyndaǵy iri qarjylyq emes kompaniialardy biriktiretin Nasdaq 100 indeksi shamamen 6,4 paiyzǵa tómendegen. Sonyń saldarynan oǵan kiretin kompaniialardyń jalpy naryqtyq kapitalizatsiiasy bir kúnde shamamen 2,3 trln dollarǵa qysqardy. Bul investorlar dál osynsha qarajatty naryqtan shyǵaryp aldy degendi bildirmeidi, tek kompaniialardyń naryqtyq baǵasy tómendegenin kórsetedi.
Jasandy intellekt salasyna qatysty alańdaýshylyq kúsheidi
Naryqtaǵy quldyraýdyń basty sebepteriniń biri – jasandy intellekt infraqurylymynyń bolashaǵyna qatysty belgisizdik. AQSh-taǵy aralyq sailaýda demokrattardyń jeńiske jetýinen keiin investorlar data-ortalyqtar salýǵa ruqsat alý qiyndap, jańa jobalardyń júzege asýy uzaqqa sozylýy múmkin dep qaýiptenip otyr.
Sonymen qatar serverlerge, chipterge jáne energetikalyq qýattarǵa jumsalǵan qyrýar qarjynyń qanshalyqty jyldam tabys ákeletini de kúmán týdyrdy. Keibir kompaniialar infraqurylymdy keńeitý úshin qaryz qarajatyn paidalanyp otyr. Sondyqtan jobalardyń keshigýi olardyń qarjylyq jaǵdaiyna qosymsha salmaq túsirýi múmkin.
Ásirese jartylai ótkizgishter men derekterdi saqtaý qurylǵylaryn óndirýshilerdiń aktsiialary qatty arzandady. Máselen, Nvidia aktsiialary 9,3 paiyzǵa, Micron 17,5 paiyzǵa, Sandisk 22,3 paiyzǵa tómendedi.
Iri tehnologiialyq kompaniialar da shyǵynǵa ushyrady. Microsoft aktsiialary 3,6 paiyzǵa, Meta 4 paiyzǵa, Alphabet 2,2 paiyzǵa arzandady. Al S&P 500 indeksine kiretin 11 sektordyń barlyǵy saýdany tómen kórsetkishpen aiaqtady.
Data-ortalyqtar qurylysynyń baiaýlaýy jabdyq óndirýshilerine de keri áser etýi múmkin. Sebebi tapsyrystar keiinge shegerilip, kompaniialardyń kirisi kútilgen deńgeiden tómendeýi yqtimal. Jasandy intellektke suranys ósken kúnniń ózinde, esepteý qýattaryn iske qosý merziminiń ózgerýi osy salaǵa qyzmet kórsetetin kásiporyndardyń qarjylyq nátijesine yqpal etedi.
Investorlar aktsiialaryn jappai satýǵa kiristi
Jasandy intellektke arnalǵan esepteý qýattaryn usynatyn CoreWeave jáne Nebius kompaniialarynyń aktsiialary da aitarlyqtai arzandady. Birinshisiniń baǵaly qaǵazdary shamamen 10 paiyzǵa, ekinshisiniki 15 paiyzǵa tómendedi.
CNN málimetinshe, investorlar infraqurylymnyń shamadan tys kóp salyný qaýpin de qaita baǵalap jatyr. Iaǵni kompaniialar aldaǵy ýaqytta tutynýshylarǵa qajet bolatyn kólemnen artyq data-ortalyqtar men esepteý qýattaryn quryp qoiýy múmkin.
Bir qyzyǵy, buǵan deiin naryq yqtimal shekteýlerdi iri korporatsiialar úshin tiimdi jaǵdai retinde qarastyrǵan. Qurylys qarqynynyń baiaýlaýy olardyń kúrdeli shyǵyndaryn azaityp, qoldanystaǵy infraqurylymnyń qunyn arttyrýy múmkin degen boljam bolǵan. Alaida kelesi saýda kúnindegi jaǵdai investorlardyń búkil jasandy intellekt indýstriiasynyń damý qarqynyna alańdai bastaǵanyn kórsetti.
Oninvest basylymynyń Vanda Research derekterine silteme jasap habarlaýynsha, bólshek investorlar bir kúnde aktsiialardan 358 mln dollar shyǵarǵan. Bul – 2020 jylǵy naýryzdan bergi eń joǵary kórsetkish.
Sarapshylar naryqtaǵy taǵy bir ózgeriske nazar aýdardy: investorlar burynǵydai baǵasy tómendegen aktsiialardy satyp alýǵa asyqpaidy. Al naryqtaǵy qubylmalylyqty kórsetetin VIX indeksi («qorqynysh indeksi») shamamen 60 paiyzǵa ósip, 26 pýnktten asty.
Sarapshylardyń pikiri ekige bólindi
Naryqtaǵy jaǵdaiǵa qatysty sarapshylardyń boljamy ártúrli. Yardeni Research kompaniiasynyń prezidenti Ed Iardeni jasandy intellekt infraqurylymynyń damý qarqynynyń baiaýlaýy naryqtaǵy alypsatarlyq qyzýdy tómendetýi múmkin dep esepteidi.
Al keibir sarapshylar aktsiialar baǵasynyń arzandaýyn tiimdi investitsiialyq múmkindik retinde qarastyrady. Degenmen olar uzaq merzimdi suranys pen ár kompaniianyń naqty tabys ákelý áleýetin eskerý qajet ekenin aitady.
Nasdaq indeksiniń túzetý kezeńine ótýi qor naryǵyndaǵy quldyraýdyń aýqymyn kórsetedi. Alaida bul jaǵdai naryqtyń aldaǵy baǵytyn birjaqty anyqtamaidy. Endi investorlar biliktiń naqty sheshimderin, kompaniialardyń investitsiialyq josparlaryndaǵy ózgeristerdi jáne jasandy intellektke jumsalǵan shyǵyndardyń qanshalyqty tabys ákeletinin jiti baqylamaq.
