Frantsiiada 5 qarasha kúni aýqymdy narazylyq aktsiialary ótip, eldegi jaǵdai kúrdelene tústi. Ereýil saldarynan mektepter, aýrýhanalar men qoǵamdyq kólik jumysyna kedergi keldi. Parijde Eifel munarasy men Lývr mýzeiiniń keibir kórme zaldary jabyldy, dep habarlaidy dalanews.kz.
BBC málimetinshe, jalpyulttyq ereýildi bes kásipodaq uiymy uiymdastyrǵan. Olarǵa joǵary synyp oqýshylary, stýdentter jáne turmys qunynyń ósýine narazy turǵyndar qosylǵan. Narazylyq bildirýshiler bul aktsiialardy kúrestiń «tek bastamasy» dep atady.
Ereýilge shyqqandar eń tómengi jalaqyny kóterýdi, bilim berý salasyn qarjylandyrýdy arttyrýdy jáne memlekettik qyzmetterdiń sapasyn jaqsartýdy talap etti.
Eldegi narazylyqqa qatysqandardyń sany jóninde resmi derekter ártúrli. Le Monde basylymy Jalpy eńbek konfederatsiiasyna (CGT) silteme jasap, sherýge shamamen 1,6 million adam qatysqanyn jazdy. Onyń 350 myńy Parij kóshelerine shyqqan.
Al Frantsiia Ishki ister ministrliginiń málimetinshe, narazylyqqa el boiynsha 575 myń adam qatysqan. Onyń ishinde 65 myńy – Parij turǵyndary.
Ministrlik sherýlerdiń basym bóligi salystyrmaly túrde tynysh ótkenin habarlaǵanymen, Renn, Týlýza, Parij, Bordo jáne Strasbýrg qalalarynda politsiia men demonstranttar arasynda qaqtyǵys bolǵan. Quqyq qorǵaý organdary kózden jas aǵyzatyn gaz ben sý atqysh kólikterdi qoldanǵan.
Keibir kóshelerde órt shyqqan. Týlýza qalasyna jaqyn jerde mektep ǵimaraty órtenip ketken.
Sońǵy málimet boiynsha, Frantsiiada 448 adam ustalyp, qaýipsizdik kúshteriniń 53 qyzmetkeri jaraqat alǵan. Narazylyq bildirýshiler arasynda zardap shekkender bar-joǵy týraly ázirge resmi aqparat jariialanǵan joq.
Úkimet kásipodaqtarmen kelissóz júrgizbek
9 qarashada Frantsiia premer-ministri Sebasten Lekorniý «áleýmettik konferentsiia» ótkizedi. Kezdesýge kásipodaqtar men jumys berýshilerdiń ókilderi qatysyp, jalaqy máselesi men halyqtyń satyp alý qabiletin talqylaidy.
Aita keteiik, Frantsiiada biyl kúzde narazylyq aktsiialary alǵash ret ótip otyrǵan joq. Qazan aiynda da eldiń ártúrli aimaqtarynda sherýler uiymdastyrylyp, buqaralyq aqparat quraldarynyń málimetinshe, eki myńnan astam adam ustalǵan.
