Batys Qazaqstan oblysy boiynsha Memlekettik kirister departamenti basqarmasy basshysynyń burynǵy mindetin atqarýshy 100 mln teńge para alǵany úshin 10 jylǵa bas bostandyǵynan aiyryldy. Onyń sybailasy deldaldyq jasaǵany úshin 1 jyl 6 aiǵa sottaldy. Bul týraly Astana qalalyq sottarynyń baspasóz qyzmeti málimdedi, dep habarlaidy dalanews.kz.
Astana qalasynyń qylmystyq ister jónindegi mamandandyrylǵan aýdanaralyq soty 2026 jylǵy 4 qarashada R. jáne K. esimdi azamattarǵa qatysty aiyptaý úkimin shyǵarǵan. Olar asa iri mólsherde para alý jáne paraqorlyqqa deldal bolý baptary boiynsha kináli dep tanyldy.
Sot materialdaryna sáikes, 2025 jylǵy qyrkúiek-qazan ailarynda basqarma basshysynyń mindetin atqarǵan R. Resei azamatyna Batys Qazaqstan oblysyndaǵy ótkizý beketteri arqyly júk kólikterin kedergisiz ótkizýge kómektesýdi usynǵan.
Júk kólikteriniń Qazaqstanǵa kedergisiz kirýine jalpy qamqorlyq jasaǵany úshin sheneýnikke 100 mln teńge berilgen. Bul qarajatqa Reseiden Qazaqstanǵa 1003 júk kóligin ótkizý kózdelgen.
Budan bólek, para berýshi ózine baǵynysty zańdy tulǵalar men jeke kásipkerlerdiń táýekelderdi basqarý júiesine engizilgeni týraly málimetter alyp, týyndaǵan shekteýlerdi ainalyp ótý jóninde keńes alǵan.
Al K. parany jetkizýde deldal bolǵany úshin 24,8 mln teńge alǵan.
Sot R.-ny Qylmystyq kodekstiń 366-baby 4-bóligi boiynsha kináli dep tanyp, múlkin tárkileýmen birge 10 jylǵa bas bostandyǵynan aiyrý jazasyn taǵaiyndady. Sonymen qatar oǵan belgili bir laýazymdardy ómir boiy atqarýǵa tyiym salyndy.
K. Qylmystyq kodekstiń 368-baby 1-bóligi boiynsha kináli dep tanylyp, múlkin tárkileýmen birge 1 jyl 6 aiǵa sottaldy. Oǵan da belgili bir laýazymdardy ómir boiy atqarýǵa tyiym salyndy.
Sot eki sottalýshynyń da kámeletke tolmaǵan balalary baryn jeńildetetin mán-jai retinde eskergen. Al R.-ǵa qatysty buryn qabyldaǵan antyn buzǵan adamnyń qylmys jasaýy aýyrlatatyn mán-jai dep tanyldy.
Sot qylmystyq jolmen alynǵany anyqtalǵan aqshany memleket kirisine tárkileý jáne sottalǵandardan zańsyz alynǵan qarajatty óndirip alý týraly da sheshim shyǵardy.
Úkim ázirge zańdy kúshine engen joq.
