Aqmola oblysynda birneshe kólik soqtyǵysqan jol apatynan qaza tapqandar sany úsh adamǵa jetti. Qaiǵyly oqiǵa saldarynan taǵy birneshe adam zardap shekken, dep habarlaidy dalanews.kz.
Jol-kólik oqiǵasy 1 qarasha kúni keshki ýaqytta Astana – Petropavl tasjolynyń Makinsk qalasyna jaqyn tusynda bolǵan.
Aldyn ala málimet boiynsha, apatqa tórt avtokólik qatysqan. Áýeli boijetken tizgindegen Toyota Camry jol jiegindegi qorshaýǵa soǵylǵan. Artynsha osy kólikke Kia Rio kelip soqtyǵysyp, keiin Chevrolet Cobalt avtokóligi de jol apatyna ushyraǵan.
Soqtyǵys saldarynan Toyota Camry júrgizýshisi men jolaýshysy joldyń qozǵalys bóligine shyǵyp ketken. Sol sátte jolmen kele jatqan Geely avtokóligi eki áieldi qaǵyp, ekeýi de alǵan jaraqattarynan oqiǵa ornynda kóz jumǵan.
Apat saldarynan zardap shekken bes adam Bulandy aýdandyq aýrýhanasyna jetkizilgen. Alaida olardyń biri, basynan aýyr jaraqat alǵan er adam, dárigerlerdiń kómegine qaramastan aýrýhanada qaitys boldy. Osylaisha, qaiǵyly oqiǵadan kóz jumǵandar sany úsh adamǵa jetken.
Qaza tapqandardyń arasynda Petropavl qalasynyń turǵyndary da bar. Málimetke súiensek, marqum erli-zaiyptylar elordada turatyn qyzyna baryp, úilerine qaityp kele jatqan.
Qaitys bolǵandardyń biri – Petropavl qalalyq №2 emhanasynda himizator bolyp jumys istegen Aigúl Jýandyqova. Meditsinalyq mekemeniń qyzmetkerleri áriptesiniń qazasyn rastap, onyń otbasy men jaqyndaryna kóńil aitqan.
