Áleýmettik jelilerde qazaqstandyq oqýshy Aihanym Oqasovanyń AQSh-taǵy Garvard ýniversitetine oqýǵa túskeni týraly jariialanǵan aqparat qyzý talqylanyp jatyr, dep habarlaidy dalanews.kz.
Threads jelisindegi qoldanýshy onyń sheteldik joǵary oqý oryndaryna túskeni, birneshe grant iegeri bolǵany jáne toǵyz til meńgergeni týraly málimdemelerine kúmán keltirip, birqatar qujattardyń túpnusqalyǵyn teksergenin habarlady.
Jariialanym avtorynyń aitýynsha, oqýshy ózin Harvard Extension School oqý ornynyń Bachelor of Liberal Arts baǵdarlamasyna qabyldanǵanyn jáne International Student Scholarship grantyn ielengenin málimdegen. Alaida avtor Garvard ýniversitetiniń qabyldaý bólimine júginip, áleýmettik jelide jariialanǵan qabyldaý jáne shákirtaqy týraly hatty tekserýge jibergen.
Threads jazbasynda kórsetilgen ýniversitet ókilderiniń jaýabyna sáikes, usynylǵan qujat túpnusqa emes jáne Harvard Extension School mekemesiniń qabyldaý talaptary men qarjylai kómek usyný erejelerine sáikes kelmeidi.
Sonymen qatar ýniversitettiń jaýabynda Bachelor of Liberal Arts baǵdarlamasyna túsý úshin talapker mektepti bitirgennen keiin keminde bes jyl ótýi kerektigi aitylǵan. Qazirgi ýaqytta mektepte oqyp júrgen talapkerler bul baǵdarlamaǵa qabyldana almaidy.
Jariialanym avtory budan bólek University of Minnesota Twin Cities ýniversitetine de júgingenin málimdedi. Onyń jazýynsha, ýniversitet ókilderi oqýshy jariialaǵan qabyldaý hatyn rastamaǵan. Kerisinshe, qujattyń shynaiy emes ekenin jáne jasandy intellekt kómegimen jasalǵan bolýy múmkin ekenin aitqan.
Sondai-aq jazbada Aihanym Oqasovanyń FLEX 2025–2026 almasý baǵdarlamasyna qatysýshy bolǵany týraly málimdemesi de sóz bolady. Avtor jariialanǵan qujattyń oqýshynyń baǵdarlamaǵa qatysýǵa ótinim bergenin ǵana rastaitynyn, al irikteýden ótkenin dáleldemeitinin alǵa tartqan.
Buǵan qosa, onyń toǵyz til meńgergeni týraly málimdemesine de kúmán keltirilgen. Jariialanym avtory korei tilindegi jazbalaryna qatysty syn-pikirlerdi keltirip, til deńgeiin rastaityn naqty dálelder jetkiliksiz ekenin atap ótken.
Qazirgi ýaqytta Threads jelisinde taraǵan bul aqparat qoǵam nazaryn aýdaryp, qyzý talqylanyp jatyr. Degenmen oqiǵanyń barlyq mán-jaiy, onyń ishinde oqýshynyń óz túsiniktemesi men jariialanǵan qujattardyń túpnusqalyǵy qosymsha tekserýdi qajet etedi.
