Almatyda jyl basynan beri saýda zańnamasyn buzǵan kásipkerlerge qatysty 2003 ákimshilik hattama toltyrylyp, jalpy somasy 82 mln teńgeden asatyn aiyppul salyndy. Onyń ishinde áleýmettik mańyzy bar azyq-túlik taýarlaryna belgilengen saýda ústemesin asyrý derekteri de bar, dep habarlaidy dalanews.kz.
Qala ákimdiginiń málimetinshe, ákimshilik hattamalar áleýmettik mańyzy bar azyq-túlik taýarlaryna ruqsat etilgen saýda ústemesin arttyrý jáne saýda qyzmeti týraly zańnamanyń ózge de talaptaryn buzý faktileri boiynsha rásimdelgen.
Alaida ákimdik habarlamasynda atalǵan hattamalardyń naqty qanshasy saýda ústemesin asyrýǵa qatysty ekeni, qansha kásipker jaýapqa tartylǵany jáne olardyń qandai saýda nysandaryn basqaratyny kórsetilmegen.
Baqylaý jumystaryn Almaty qalasynyń Kásipkerlik jáne investitsiialar basqarmasy Saýda jáne tutynýshylardyń quqyqtaryn qorǵaý departamentimen jáne basqa da memlekettik organdarmen birlesip júrgizip jatyr.
Sonymen qatar qalada deldaldyq shemalardy tergeý jónindegi óńirlik komissiianyń otyrystary turaqty ótedi. Komissiia ónimniń jetkizýshiden bastap dúken sóresine deiingi baǵa qalyptasý tizbegin zerdeleidi.
Monitoringke iri saýda nysandary, saýda jelileri, sýpermarketter, bazarlar men úi janyndaǵy dúkender qamtylǵan. Áleýmettik mańyzy bar azyq-túlik taýarlaryna memleket saýda ústemesiniń shekti mólsherin belgileidi. Bul talap birinshi kezektegi taýarlar baǵasynyń negizsiz ósýine jol bermeýge baǵyttalǵan.
Qala ákimdigi tekserý jumystary jalǵasatynyn habarlady. Baqylaýdyń maqsaty – naryqqa qatysýshylardyń zań talaptaryn saqtaýyn qamtamasyz etý jáne azyq-túlik baǵasynyń turaqtylyǵyn ustap turý.
