Qazaqstan jylyna 100 million tonnaǵa jýyq munai óndirse de, aldaǵy birneshe jylda benzin tapshylyǵyna tap bolýy múmkin. Munai-gaz salasynyń sarapshysy Asqar Ismailov osyndai boljam jasady, dep habarlaidy dalanews.kz Finratings.kz-ke siltep.
Sarapshynyń aitýynsha, 2030 jylǵa qarai otandyq munai óńdeý zaýyttaryna shikizat jetpei qalýy yqtimal. Mundai jaǵdaida benzin qymbattatýy da máseleni sheshpeidi.
"Benzin baǵasyn 1000 teńgege deiin kóterýge bolady. Biraq óńdeitin munaidyń ózi bolmaidy", - dedi ol TENGE TALKS YouTube arnasyndaǵy suhbatynda.
Ismailov munyń sebebin eski ken oryndaryndaǵy óndiris azaiýymen jáne munai kompaniialary shyǵyny kóbeiýimen bailanysty dep túsindirdi. Onyń sózinshe, ishki naryqtaǵy munai baǵasy eksporttyq baǵadan áldeqaida tómen. Sondyqtan keibir kompaniialarǵa munai óndirý tiimsiz bolýy múmkin.
Sarapshy Qazaqstanda óndiriletin munaidyń basym bóligi shetelge satylatynyn eske saldy. Teńiz, Qashaǵan jáne Qarashyǵanaq siiaqty iri jobalar negizinen eksportqa jumys isteidi. Al otandyq zaýyttar uzaq jyldan beri igerilip kele jatqan basqa ken oryndarynyń munaiyna táýeldi.
"2030 jylǵa qarai Qazaqstanda óńdeýge arnalǵan munai qatty jetispeidi. Munai óńdeý zaýyttarynyń qýatynyń jartysy paidalanylmai qalýy múmkin", – dedi Ismailov.
Ol benzinniń bir litri bolashaqta bir dollarǵa deiin qymbattaýy múmkin ekenin de joqqa shyǵarmady. Degenmen bul - naqty bekitilgen baǵa emes, sarapshynyń boljamy. Ismailovtyń pikirinshe, Qazaqstanǵa tórtinshi munai óńdeý zaýyty qajet. Biraq jańa kásiporyn Teńiz ben Qashaǵan munaiyn óńdeýge beiimdelýge tiis. Áitpese jańa zaýyt salynǵan kúnniń ózinde shikizat tapshylyǵy sheshilmeýi múmkin.
Energetika ministrligi 2033 jylǵa qarai eldegi munai óńdeý qýatyn jylyna 18,4 million tonnadan 40 million tonnaǵa deiin arttyrýdy josparlap otyr. Ismailov bul jospardy júzege asyrý úshin aldymen zaýyttardy jetkilikti munaimen qamtamasyz etý máselesin sheshý qajet dep sanaidy. Áitpese 2030 jylǵa qarai Qazaqstanda benzin men dizel otyny qymbattap qana qoimai, tapshylyq ta týyndaýy múmkin.
