Qazaqstanda taǵy bir milliarder paida boldy. Bul týraly Premer-ministrdiń orynbasary – jasandy intellekt jáne tsifrlyq damý ministri Jaslan Mádiev málimdedi. Ol Higgsfield kompaniiasynyń negizin qalaýshylardyń biri Aleks Mashrabovqa Qazaqstan azamattyǵyn tabystaǵanyn habarlady, dep habarlaidy dalanews.kz.
Ministrdiń aitýynsha, 30 qazanda Memleket basshysy Qasym-Jomart Toqaev Aleks Mashrabovqa Qazaqstan azamattyǵyn berý týraly jarlyqqa qol qoiǵan. Jaslan Mádiev bul sheshim elimizde jasandy intellekt salasyn damytýǵa jáne talantty mamandardy qoldaýǵa baǵyttalǵanyn atap ótti.
«Prezident jasandy intellektini damytýǵa jáne talantty mamandardy qoldaýǵa erekshe kóńil bóledi. Bolashaq tehnologiialaryn jasap júrgen adamdar óz josparlaryn Qazaqstanmen bailanystyryp, osynda ideialaryn júzege asyrýǵa múmkindik tapqanyn qalaimyz», – dep jazdy ministr.
Ol sondai-aq Higgsfield komandasyna Qazaqstannyń jasandy intellekt indýstriiasyn damytýǵa qosqan úlesi úshin alǵys bildirdi. Ministrdiń sózinshe, kompaniia álemdik naryqta suranysqa ie eksporttyq ónim jasap, búginde onyń qyzmetin 40 millionnan astam adam paidalanady.
«Bul – úlken jetistik. Sizderdiń tabystaryńyz jastarymyzǵa úlgi bola alady. Qazaqstanda júrip-aq álemdik deńgeidegi tehnologiialardy jasap, jetekshi kompaniialarmen básekelesýge jáne halyqaralyq naryqqa shyǵýǵa bolatynyn kórsetedi», – dedi Jaslan Mádiev.
Ministr Aleks Mashrabovtyń Qazaqstanǵa senim artyp, elimizdiń azamaty bolýǵa sheshim qabyldaǵanyn da atap ótti. Onyń aitýynsha, aldaǵy ýaqytta taraptar jańa ónimder ázirlep, talanttardy damytýǵa jáne Qazaqstannyń tehnologiialyq áleýetin nyǵaitýǵa birlese kúsh salmaq.
«Aleks, Qazaqstan azamattyǵyn alýyńyzben quttyqtaimyn!» – dep jazdy ministr.
