Qazaqstandyq jýrnalist Talǵat Almanov AQSh-taǵy áigili telearnada basshylyq laýazymǵa taǵaiyndaldy, dep habarlaidy dalanews.kz.
Ol AQSh-tyń Niý-Iork shtatyndaǵy ABC 7 (Býffalo) telearnasynda basshylyq qyzmetke taǵaiyndalǵan. Jýrnalist bul jańalyǵyn áleýmettik jelidegi paraqshasynda bólisti. Ol telearnada Executive Reporter qyzmetin atqaratynyn málimdedi.
"Telearnadaǵy alǵashqy basshylyq qyzmetke kiriskenimdi erekshe qýanyshpen habarlaimyn! Niý-Iorktiń áigili ABC 7 (Býffalo) telearnasynda Executive Reporter qyzmetin atqaramyn", - dep jazdy ol.
Talǵat Almanov jańa qyzmetinde jańalyqtar bóliminiń jumysyn qadaǵalap, jýrnalister men prodiýserlermen birlesip jumys isteidi. Sondai-aq, jańalyqtar sapaly ázirlenip, kórermenge ýaqtyly jetýine jaýap beredi. Budan bólek, ol reportajdar daiyndap, zertteý jýrnalistikasymen ainalysýdy jalǵastyrmaq.
"Maǵan osyndai jaýapty mindetti senip tapsyrǵan basshylyǵyma erekshe alǵys bildiremin. Kórsetilgen senimdi aqtap, jańa qyzmetimdi abyroimen atqarý úshin bar kúshimdi salamyn! Sáttilik tilep qoiyńyzdar, dostar!" - dedi jýrnalist.
