Almatyda qarasha aiy bastala salysymen jańajyldyq shyrsha ornatylyp, áleýmettik jelide qyzý talqylanyp jatyr. Qala turǵyndarynyń bir bóligi merekelik bezendirýdi tym erte bastalǵan naýqan dep sanasa, endi biri shyrshanyń kúz mezgilinde turǵanyna ázilmen qaraǵan. Osy jaǵdaiǵa bailanysty Medeý aýdanynyń ákimdigi de pikir bildirdi, dep habarlaidy dalanews.kz.
Jańajyldyq shyrshanyń sýretin Instagram jelisindegi dilorom__estate paraqshasynyń avtory jariialaǵan. Ol jazbasynda Almatyda qarasha endi bastalǵanyn aityp, shyrshany bezendirýge áli erte emes pe degen saýal qoidy.
«Almaty, qarasha endi ǵana bastaldy ǵoi. Shyrshany bezendirýge erte emes pe? Qalai oilaisyzdar?» – dep jazdy ol.
Jazbaǵa pikir qaldyrǵan jeli qoldanýshylarynyń pikiri ekige bólindi. Biri qala biligi Jańa jylǵa daiyndyqty tym erte bastaǵanyn aityp ázildese, endi biri merekelik kóńil kúidiń erte kelgenine qarsy emes ekenin jetkizdi.
«Buryn ýaqytynan erte shyrsha qoisa, kózimiz úirenip, Jańa jyl jaqyndaǵandai sezilmeitin», – dep jazdy jazba avtory pikirlerdiń birine jaýap retinde.
Taǵy bir qoldanýshy shyrshanyń jasyl aǵashtardyń arasynda turǵanyna ázilmen nazar aýdardy. Al keibiri basqa elderde, sonyń ishinde Kiprde de merekelik bezendirý jumystary qazan aiynan bastalatynyn eske saldy.
Jelide taraǵan talqylaýǵa Medeý aýdanynyń ákimdigi de jaýap berdi. Ákimdiktiń resmi paraqshasynda bul shyrshany kásipkerler óz qarajatyna ornatqany aitylǵan.
«Bul shyrshany kásipkerler óz qarajaty esebinen ornatqan. Menshik iesimen túsindirý jumystary júrgiziledi», – dep habarlady aýdan ákimdigi.
