Qazaqstanda "Halyqtyq qurylys" baǵdarlamasy aiasynda jalpy quny 1,5 trln teńge bolatyn 262 infraqurylymdyq joba maquldandy. Qarajat aýrýhanalar men mektepter salýǵa, joldardy jóndeýge, sondai-aq sý, jylý jáne gaz júielerin damytýǵa baǵyttalady, dep habarlaidy dalanews.kz.
Bul týraly Úkimettegi brifingte Premer-ministrdiń birinshi orynbasary Nurlybek Nálibaev málimdedi. Onyń aitýynsha, jobalardyń 122-sin júzege asyrýǵa 497 mlrd teńge bólinip qoiǵan.
Eń kóp qarjy jol men kólik nysandaryna bólinedi
Baǵdarlamadaǵy eń iri qarjy kólik infraqurylymyn damytýǵa qarastyrylǵan. Jalpy somasy 369 mlrd teńge bolatyn 48 joba aiasynda avtomobil joldary men kópirler salynyp, qoldanystaǵy nysandar qaita jańǵyrtylady.
Densaýlyq saqtaý salasyna 344 mlrd teńge baǵyttalmaq. Bul qarajatqa 41 joba, sonyń ishinde aýrýhanalar, emhanalar, perinataldyq ortalyqtar men perzenthanalar salynady.
Sýmen jabdyqtaý jáne sý burý júielerin damytýǵa 284 mlrd teńge bólinedi. 55 joba aiasynda magistraldyq sý qubyrlaryn, tazartý qurylǵylaryn, qorǵanys bógetteri men sý toǵandaryn salý josparlanǵan.
Eń kóp joba jylý jáne gaz salasynda júzege asyrylady
Joba sany jaǵynan jylý jáne gazben jabdyqtaý salasy alda tur. Bul baǵytta 136 mlrd teńgege 67 joba iske asyrylady.
Mádeniet, týrizm jáne sport salalarynda jalpy quny 266 mlrd teńge bolatyn 23 nysan salynady. Olardyń qatarynda sport keshenderi, mádeniet sarailary, teatrlar jáne basqa da áleýmettik nysandar bar.
Bilim berý salasyna 101 mlrd teńge qarastyrylǵan. Qarajat 28 jobaǵa, onyń ishinde mektepter men kópfýnktsiialy keshen salýǵa jumsalady.
