Qazaqstanda 2027-2029 jyldary aqyly avtomobil joldarymen júrý tarifterin kezeń-kezeńimen kóterý josparlanyp otyr. Jeńil kólikter men salmaǵy 10 tonnaǵa deiingi júk kólikteri úshin tólem 30 paiyzǵa deiin, al 10 tonnadan aýyr júk kólikteri úshin 50 paiyzǵa deiin ósýi múmkin. Bul týraly «Atameken» ulttyq kásipkerler palatasy málimdedi, dep habarlaidy dalanews.kz.
Kólik ministrligi tarifterdi jańartý josparyn bekitken. Ózgerister kóliktiń barlyq sanatyna qatysty bolady. Tólem mólsheri kólik túrine qarai saralanyp, jyl saiyn kezeń-kezeńimen qaita qaralmaq.
Kólik ministrliginiń túsindirýinshe, tarifterdi kóterý aqyly joldardy kútip ustaý, paidalaný jáne olardyń tehnikalyq jaǵdaiyn tiisti deńgeide saqtaý úshin qajet. Jinalǵan qarajat jol infraqurylymyn jóndeý men kútip ustaýǵa baǵyttalýy tiis.
Alaida «Atameken» kásipkerler palatasy tarifterdiń ósýi júk tasymaly, logistika jáne saýda salasyna qosymsha salmaq túsirýi múmkin ekenin eskertti. Palata ókilderiniń pikirinshe, jol aqysynyń qymbattaýy tasymal qunynyń ósýine, kásipkerlerdiń shyǵyndarynyń artýyna, sonyń saldarynan taýarlar men qyzmetterdiń baǵasyna áser etýi yqtimal.
Osyǵan bailanysty «Atameken» tarifterdi qaita qaraý kezinde biznes ókilderimen ashyq dialog júrgizip, sheshimniń ekonomikalyq saldaryn aldyn ala baǵalaý qajet dep sanaidy. Palata jańa tarifter ekonomikalyq turǵydan negizdelgen, kezeń-kezeńimen engiziletin jáne aldyn ala boljanatyn bolýy kerektigin atap ótti. Tólem mólsherin belgileý kezinde kóliktiń sanaty men tehnikalyq sipattamalary, aqyly jol ýchaskeleriniń qanshalyqty jii paidalanylatyny jáne qosymsha shyǵyndardyń kólik-logistika salasyna áseri eskerilýi tiis.
Sonymen qatar kásipkerler palatasy aqyly joldar jelisin damytý tek tarifterdi kóterý esebinen júzege aspaýy kerek ekenin jetkizdi. Jinalǵan qarajattyń ashyq jumsalýy, jol sapasynyń jaqsarýy jáne infraqurylymdy kútip ustaý tiimdiliginiń artýy da mańyzdy.
