Qazaqstan Jazýshylar odaǵynyń múshesi, halyqaralyq "Alash" ádebi syilyǵynyń laýreaty, belgili aqyn Gúlzada Nietqalieva 60 jasynda ómirden ótti. Qaraly habardy Qazaqstan Jazýshylar odaǵynyń baspasóz qyzmeti jetkizdi, dep habarlaidy dalanews.kz.
Gúlzada Rahmetqyzy Nietqalieva 1966 jylǵy 1 maýsymda Atyraý oblysy Qurmanǵazy aýdanynyń Kóptoǵai aýylynda dúniege kelgen. Gýrev pedagogika institýtynyń tarih fakýltetin támamdaǵan. Filologiia ǵylymdarynyń kandidaty.
Qalamger eńbek jolyn ustazdyqtan bastaǵan. 1987-2000 jyldary Qurmanǵazy aýdanyndaǵy mektepterde muǵalim bolyp qyzmet atqarǵan.
Keiin jýrnalistika salasyna aýysyp, 2000-2005 jyldary Atyraý oblystyq televiziiasynda aǵa redaktor bolǵan. Odan keiin "Aq Jaiyq" aptalyq gazetinde, «Qaisar» basylymynda jáne oblystyq "Atyraý" gazetinde jaýapty qyzmetter atqarǵan.
Qazaq ádebietine mol mura qaldyrdy
Gúlzada Nietqalieva "Aqbota kúndi ańsaýmen", "Aidyń súttei sáýlesi", "Qarlyǵashy Qiǵashtyń", "Ardaqtym", "Júrektegi janartaý", "Hazar qasidalary" jáne "Allajar" atty jyr jinaqtarynyń avtory.
Aqyn poeziiamen qatar ádebi zertteý salasynda da eńbek etti. Ol Esenǵali Raýshanovtyń shyǵarmashylyǵyna arnalǵan "Tuma jyrdyń tunyǵy", sondai-aq Rahymjan Otarbaev týraly "Dara" jáne "Jalǵyz atty jolaýshy" monografiialaryn jazǵan.
2017 jyly qalamgerdiń "Júrektegi iman gúli" atty dastany Ulybritaniiada jaryq kórdi.
"Qiǵashtyń qarlyǵashy" atanǵan aqyn
Gúlzada Nietqalieva týǵan ólkesiniń tabiǵaty men el ómirin óleńderine arqaý etip, ádebi ortada "Qiǵashtyń qarlyǵashy" degen atqa ie bolǵan.
2003 jyly Mahambet Ótemisulynyń 200 jyldyǵyna orai "Mahambet-200" telehabarlar toptamasyn júrgizip, "Qaroi qasireti" dastanyn jazǵan.
Qalamger 2021 jyldan bastap respýblikalyq "Saraishyq" ádebi-mádeni jýrnalynyń bas redaktory qyzmetin atqarǵan.
2026 jyly Halel Dosmuhameduly atyndaǵy Atyraý ýniversitetiniń Ǵylymi keńesi oǵan Qurmetti professor ataǵyn bergen.
Halyqaralyq "Alash" ádebi syilyǵynyń iegeri Gúlzada Nietqalieva qazaq poeziiasy men jýrnalistikasynda ózindik qoltańbasyn qaldyrdy.
