Qazaqstandyq veterinarlar arnaiy kiimdi óz qarajatyna satyp alýǵa májbúr. Jazǵy kiimniń quny 70–80 myń teńge bolsa, qysqy formanyń baǵasy 200 myń teńgeden asady. Bul týraly Quryltai depýtaty, Agrarlyq máseleler, ekologiia jáne tabiǵi resýrstar komitetiniń tóraǵasy Serik Eginbaev málimdedi, dep habarlaidy dalanews.kz.
Depýtattyń aitýynsha, veterinar mamandardyń ortasha jalaqysy búginde 220 myń teńgeni quraidy. Al arnaiy kiimniń qymbattyǵy olardyń áleýmettik jaǵdaiyna qosymsha salmaq túsirip otyr.
«Qazir veterinar dárigerler arnaiy kiimdi óz qarajatyna satyp alady. Jazǵy formanyń quny shamamen 70–80 myń teńge. Al qysqy kiim klimattyq erekshelikterimizdi eskergende 200 myń teńgeden asady», – dedi Serik Eginbaev Quryltaidaǵy brifingte.
Onyń sózinshe, veterinar mamandar eldiń azyq-túlik qaýipsizdigi men halyq densaýlyǵyn qorǵaýda mańyzdy ról atqarady. Alaida olardyń eńbegine qaramastan, áleýmettik qorǵalýy jetkiliksiz.
Depýtat veterinarlardyń jalaqysyn 500 myń teńgege deiin kóterýdi usyndy. Sonymen qatar ǵylymi dárejesi bar mamandarǵa qosymsha aqy tóleý jáne eńbek demalysy kezinde saýyqtyrý járdemaqysyn berý qarastyrylǵan.
Budan bólek, veterinarlardyń arnaiy kiimin satyp alýǵa jumsalatyn shyǵyndy biýdjet esebinen óteý usynylyp otyr.
Eske salaiyq, búgin Quryltai depýtattary veterinariia máseleleri boiynsha zańnamaǵa ózgerister men tolyqtyrýlar engizý týraly zań jobasyn birinshi oqylymda maquldady.
