Aqtaýda áieldi ańdyp, úiine baryp, telefon arqyly mazasyn alǵan er adamǵa 100 saǵat qoǵamdyq jumys jazasy taǵaiyndaldy, dep habarlaidy dalanews.kz.
Aqtaý qalalyq sotynyń málimetinshe, sottalýshy 2026 jylǵy tamyz ben qazan aralyǵynda jábirlenýshini zańsyz qýdalaǵan.
Atap aitqanda, er adam áieldiń sońynan ańdyp, úiine kelgen, páteriniń esigin qaqqan. Sondai-aq páter esiginiń ústine ornatylǵan beinekamerasy bar flesh-jinaqtaýyshty sheship alyp ketken. Budan bólek, ol jábirlenýshige WhatsApp arqyly birneshe ret qońyraý shalyp, habarlamalar jiberip, mazasyn alǵan.
Sot bul áreketter áieldiń konstitýtsiialyq quqyqtary men bostandyqtaryn buzǵanyn anyqtady.
Prokýror sottalýshyny 25 táýlikke qamaýǵa alýdy suraǵan. Al er adam kinásin tolyq moiyndap, jasaǵan áreketine ókinetinin aityp, jeńil jaza taǵaiyndaýdy ótingen.
Jábirlenýshi sottalýshyny keshirmeitinin málimdep, oǵan qatań jaza qoldanýdy surady. Sot er adamnyń kinásin tolyq moiyndap, ókingenin jeńildetetin mán-jailar retinde eskerdi. Aýyrlatatyn mán-jailar anyqtalǵan joq.
Nátijesinde ol Qylmystyq kodekstiń 115-1-baby boiynsha kináli dep tanylyp, 100 saǵat qoǵamdyq jumysqa tartyldy.
Aita keteiik, stalking úshin 200 ailyq eseptik kórsetkishke deiin aiyppul salý, sol mólsherde túzeý jumystaryna tartý, 200 saǵatqa deiin qoǵamdyq jumysqa tartý nemese 50 táýlikke deiin qamaýǵa alý jazasy qarastyrylǵan.
Úkim zańdy kúshine engen joq.
