Temirtaýda Quryltai depýtattary Únzila Shapaq pen Vadim Basin, memlekettik organdardyń, Qazaqstan Halyq Keńesiniń jáne Qaraǵandy oblysynyń Qoǵamdyq keńesiniń ókilderi metallýrgtermen kezdesti. Sapar barysynda delegatsiia Qarmet AQ óndiris oryndaryn aralap, kásiporynnyń jumys barysymen tanysty. Budan keiin ótken kezdesýde Memleket basshysy Qasym-Jomart Toqaevtyń Joldaýynda belgilengen mindetter men basym baǵyttar sóz boldy. Atap aitqanda, ónerkásipti jańǵyrtý, energetika men infraqurylymdy damytý, otandyq óndiristiń áleýetin arttyrý máselelerine nazar aýdaryldy, dep habarlaidy dalanews.kz.
Júzdesý barysynda óndiris oryndaryn tehnologiialyq turǵydan jańartý jáne Memleket basshysy jariialaǵan «Halyqtyq qurylys» baǵdarlamasynyń mańyzy da keńinen sóz boldy. Elimizdiń barlyq óńirin qamtityn bul bastama qurylys salasyn jandandyryp qana qoimai, otandyq ónerkásiptiń damýyna da tyń serpin berýge baǵyttalǵan.
Metallýrgiia salasynda mol tájiribesi bar Quryltai depýtaty Vadim Basin ónerkásipti damytýǵa qatysty mindetterdiń oryndalýy óndiristi jańǵyrtý men bilikti mamandar daiarlaýǵa tikelei bailanysty ekenin atap ótti.
"Búginde ónerkásip zaman talabyna sai jańaryp, ozyq tehnologiialardy igerip, óndiris tiimdiligin arttyrýy qajet. Metallýrgiia kásiporyndary úshin bul – básekege qabilettilikti nyǵaitýdyń jáne otandyq óndiristiń bolashaǵyn qamtamasyz etýdiń mańyzdy sharty. Óndiristik qýattardy jańartýmen qatar, zamanaýi jabdyqtarmen jumys istei alatyn, jańa tehnologiialardy jetik meńgergen bilikti mamandar daiarlaýǵa da basa mán berý kerek", – dedi Vadim Basin.
Kezdesý sońynda Joldaýda aiqyndalǵan basymdyqtardy óndiris oryndarynda júzege asyrý joldary, sondai-aq metallýrgiia salasynyń áleýetin arttyrý úshin alda atqarylýy tiis jumystar jóninde pikir almasty.
