2026 jyldyń 9 aiynyń qorytyndysy boiynsha Qazaqstanda balalarǵa qatysty quqyq buzýshylyqtar sany 3,7%-ǵa azaidy, dep habarlaidy dalanews.kz.
Oń dinamika elimizdiń birqatar óńirinde, sonyń ishinde Jambyl, Atyraý, Shyǵys Qazaqstan jáne Aqtóbe oblystarynda baiqalady.
Oqý-aǵartý ministrligi balalardyń quqyqtaryn qorǵaý salasyndaǵy memlekettik saiasattyń is júzinde júzege asyrylýyn baǵalaý úshin óńirlerge baryp, monitoring júrgizýde. Buǵan deiin kámeletke tolmaǵandardyń qatysýymen qoǵamdyq rezonans týdyrǵan oqiǵalar bolǵan nemese profilaktikalyq jumysty uiymdastyrýda kemshilikter anyqtalǵan óńirlerge erekshe kóńil bólinedi.
Atap aitqanda, Jambyl, Batys Qazaqstan, Atyraý oblystarynda jáne Jetisý oblysynda monitoring júrgizildi. Onyń nátijeleri bilim berý uiymdarynda balalardy qorǵaýdyń qoldanystaǵy tetikterin is júzinde qoldanýdy kúsheitý qajettigin kórsetti.
Ishki ister ministrligimen birlesip, balalarǵa qatysty quqyq buzýshylyqtardyń aldyn alý júiesin jetildirý jumysy jalǵasýda. Qaýip-qaterlerdi erte anyqtaýǵa, kámeletke tolmaǵandarǵa jeke qajettilikterine sai qoldaý kórsetýge jáne olardyń quqyqtarynyń buzylý faktilerine ýaqtyly den qoiýǵa erekshe kóńil bólinedi. Jańa tásilderdi pilottyq engizý barysynda pedagogterdiń kásibi qyzmetin baǵalaýǵa balalarǵa qatysty quqyqqa qaishy áreketterdi ýaqtyly anyqtaý kórsetkishin qosý kózdelgen.
2026-2027 oqý jylynan bastap 5-11 synyp oqýshylary úshin mindetti «Jeke qaýipsizdik» kýrsy engizildi. Oqýshylar qaýipti jaǵdailardy tanýdy, jeke shekaralaryn qorǵaýdy, qaýipsiz minez-qulyq erejelerin saqtaýdy jáne der kezinde kómek suraýdy úirenedi.
