Qazaqstanda «Kitap oqityn ult» respýblikalyq marafonyna 1,4 millionnan astam adam qatysyp, 574 myńnan astam kitap oqyldy. Bul týraly Mádeniet jáne aqparat vitse-ministri Arman Qyryqbaev málimdedi, dep habarlaidy dalanews.kz.
Kitap oqityn ult qalyptastyrý – mádeniet pen aǵartý salasyndaǵy memlekettik saiasattyń mańyzdy baǵyttarynyń biri. Prezident Qasym-Jomart Toqaevtyń 2026 jylǵy 16 mamyrdaǵy «Kitap oqý mádenietin damytý jáne zerdeli ult qalyptastyrý jónindegi sharalar týraly» Jarlyǵynda oqyrman mádenietin damytý, kitaphana infraqurylymyn jańǵyrtý, otandyq qalamgerlerdi qoldaý jáne ulttyq ádebi murany dáripteý basymdyqtary belgilengen.
Bul jumysqa memlekettik institýttar, bilim berý uiymdary, kitaphanalar, shyǵarmashylyq qaýym jáne qoǵamdyq bastamalardyń ókilderi qatysyp keledi. Sonyń biri – mektep oqýshylaryn, stýdentterdi, pedagogterdi, otbasylardy, eńbek ujymdaryn, memlekettik qyzmetshiler men ziialy qaýym ókilderin qamtyǵan «Kitap oqityn ult» respýblikalyq marafony.
Mádeniet jáne aqparat ministrliginiń málimetinshe, marafonǵa 1,4 millionnan astam adam qatysyp, 574 myńnan astam kitap oqylǵan, 50 myńǵa jýyq beinepikir jariialanǵan. Sońǵy eki aptada oqylǵan kitap sany 2,6 ese, beinepikir sany 2,5 ese artty. Kitapqa suranys ta ósip keledi: toǵyz aida satylym 31%-ǵa kóbeiip, 87 myńnan 114 myń danaǵa jetti. QazUEK paidalanýshylarynyń sany 367,6 myńǵa jetip, elektrondy basylymdar 6,3 millionnan astam ret qaraldy.
Jobanyń basty mindeti – kitap oqýdy kúndelikti daǵdyǵa ainaldyrý. Bul jumys bir rettik aktsiialarmen nemese oqylǵan kitap sanyn esepteýmen shektelmeýge tiis. Oqyrmannyń oidy saralaý qabiletin damytý, tanymyn keńeitý, otandyq jáne álem ádebietine qyzyǵýshylyǵyn arttyrý mańyzdy.
Osy maqsatta kitaphanalardy damytý, sapaly ádebiettiń qoljetimdiligin arttyrý, avtorlar men baspa isin qoldaý qajet. Balalarǵa, jastar men eresekterge kitapty nasihattaýdyń zamanaýi tásilderin usyný da osy jumyspen qatar júrýi tiis. Jyl sońyna deiin taǵy 28 kitaphanany jańǵyrtý josparlanǵan. Astana, Almaty jáne Qyzylordada Prezidenttik kitaphanalar salynyp, Ulttyq tsifrlyq kitaphana platformasyn qurý jumysy jalǵasyp jatyr.
