Қазақстанда 2027-2029 жылдары ақылы автомобиль жолдарымен жүру тарифтерін кезең-кезеңімен көтеру жоспарланып отыр. Жеңіл көліктер мен салмағы 10 тоннаға дейінгі жүк көліктері үшін төлем 30 пайызға дейін, ал 10 тоннадан ауыр жүк көліктері үшін 50 пайызға дейін өсуі мүмкін. Бұл туралы «Атамекен» ұлттық кәсіпкерлер палатасы мәлімдеді, деп хабарлайды dalanews.kz.
Көлік министрлігі тарифтерді жаңарту жоспарын бекіткен. Өзгерістер көліктің барлық санатына қатысты болады. Төлем мөлшері көлік түріне қарай сараланып, жыл сайын кезең-кезеңімен қайта қаралмақ.
Көлік министрлігінің түсіндіруінше, тарифтерді көтеру ақылы жолдарды күтіп ұстау, пайдалану және олардың техникалық жағдайын тиісті деңгейде сақтау үшін қажет. Жиналған қаражат жол инфрақұрылымын жөндеу мен күтіп ұстауға бағытталуы тиіс.
Алайда «Атамекен» кәсіпкерлер палатасы тарифтердің өсуі жүк тасымалы, логистика және сауда саласына қосымша салмақ түсіруі мүмкін екенін ескертті. Палата өкілдерінің пікірінше, жол ақысының қымбаттауы тасымал құнының өсуіне, кәсіпкерлердің шығындарының артуына, соның салдарынан тауарлар мен қызметтердің бағасына әсер етуі ықтимал.
Осыған байланысты «Атамекен» тарифтерді қайта қарау кезінде бизнес өкілдерімен ашық диалог жүргізіп, шешімнің экономикалық салдарын алдын ала бағалау қажет деп санайды. Палата жаңа тарифтер экономикалық тұрғыдан негізделген, кезең-кезеңімен енгізілетін және алдын ала болжанатын болуы керектігін атап өтті. Төлем мөлшерін белгілеу кезінде көліктің санаты мен техникалық сипаттамалары, ақылы жол учаскелерінің қаншалықты жиі пайдаланылатыны және қосымша шығындардың көлік-логистика саласына әсері ескерілуі тиіс.
Сонымен қатар кәсіпкерлер палатасы ақылы жолдар желісін дамыту тек тарифтерді көтеру есебінен жүзеге аспауы керек екенін жеткізді. Жиналған қаражаттың ашық жұмсалуы, жол сапасының жақсаруы және инфрақұрылымды күтіп ұстау тиімділігінің артуы да маңызды.
