Shyǵys Qazaqstan oblysynda qurylys salasynyń qarqyny artyp, el kóleminde aiqyndalǵan mindetter naqty jobalar men is-sharalar josparyna ulasyp jatyr. Óńirde turǵyn úi salý, injenerlik infraqurylymdy jańǵyrtý, áleýmettik nysandar turǵyzý baǵyttaryndaǵy jumystar júieli túrde júrgizilýde. Sonymen qatar, biregei meditsinalyq jáne iri sport nysandaryn salý jónindegi jobalar da júzege asyrylyp keledi. Memleket basshysynyń Joldaýynda belgilengen mindetterdi iske asyrýǵa kirisken óńir aldaǵy kezeńniń qurylys josparyn qazirden pysyqtaýda, dep habarlaidy dalanews.kz.
Shyǵys Qazaqstan oblysy ákimdiginde óńirlik aktiv otyrysy ótti. Oblys ákimi Nurymbet Saqtaǵanovtyń tóraǵalyǵymen ótken jiynda basqarma basshylary, áleýmettik-kásipkerlik korporatsiiasynyń ókilderi jáne memlekettik-jekemenshik áriptestik ortalyǵynyń sarapshylary, Qazaqstan Halyq Keńesiniń músheleri bas qosyp, infraqurylymdy jańǵyrtý, áleýmettik salany damytý jáne halyqtyń ómir súrý sapasyn arttyrý baǵytyndaǵy mindetterdi talqylady.
Jiynda sóz sóilegen aimaq basshysy aldaǵy ózgeristerge qajetti negizdi búginnen bastap qalyptastyrýdyń mańyzyn atap ótti.
«Prezident Qasym-Jomart Toqaev kelesi jyldy Halyqtyq aýqymdy qurylys jyly dep jariialaý bastamasynyń mańyzy erekshe. Sonymen qatar, biyl da bizdiń óńir úshin qurylys jumystary qarqyndy júrgizilgen kezeń boldy. Qazirgi ýaqytta oblystyń áleýmettik-ekonomikalyq damýy men turǵyndarymyzdyń ómir súrý sapasyn arttyrýda mańyzdy ról atqaratyn birqatar iri, óńir úshin eleýli nysandardyń qurylysyn aiaqtap, paidalanýǵa berip jatyrmyz.
Endi kelesi jyldyń negizgi basymdyqtaryn aiqyndap, aýqymdy qurylys jyly oblys úshin naqty nátijelerge, jańa nysandardyń paidalanýǵa berilýine jáne infraqurylymnyń sapaly ózgerýine jol ashýy tiis. Sondyqtan aldaǵy kezeńge arnalǵan mindetterdi, basym baǵyttar men naqty qadamdardy qazirden aiqyndaý mańyzdy», – dedi Nurymbet Saqtaǵanov.
Qurylys salasynyń biylǵy kórsetkishteri men aldaǵy josparlary týraly oblystyq qurylys, sáýlet jáne qala qurylysy basqarmasynyń basshysy Rýfat Akramov baiandady. Onyń aitýynsha, óńirde qurylys qarqyny joǵary. 2026 jyly 408,4 myń sharshy metr turǵyn úidi paidalanýǵa berý josparlanǵan. Qazirdiń ózinde jalpy aýdany 961 myń sharshy metrden asatyn turǵyn úidiń qurylysy júrgizilýde.
Turǵyn úi qurylysymen qatar injenerlik infraqurylymdy damytýǵa da basymdyq berilgen. Jalpy quny 102 mlrd teńgeni quraityn injenerlik jelilerdi tartý boiynsha 25 joba júzege asyrylýda. Nátijesinde 85 kópqabatty turǵyn úi men jeke turǵyn úi qurylysyna arnalǵan 2,6 myńnan astam jer ýchaskesin qajetti infraqurylymmen qamtamasyz etý kózdelgen.
Ásirese, densaýlyq saqtaý jáne áleýmettik saladaǵy jobalarǵa airyqsha nazar aýdarylyp otyr.
«Densaýlyq saqtaý salasyndaǵy 2026 jyldyń negizgi nátijeleriniń biri – Qazaqstanda biregei ári jalǵyz bolyp sanalatyn Gematologiia ortalyǵy qurylysynyń aiaqtalýy», – dep atap ótti Rýfat Akramov.
Budan bólek, jyl sońyna deiin Óskemende Onkologiia ortalyǵynyń jańartylǵan hirýrgiialyq korpýsyn paidalanýǵa berý josparlanǵan. Jobanyń quny – 3,5 mlrd teńge. Sondai-aq, Ana men bala ortalyǵy bazasynda quny 6,5 mlrd teńge bolatyn jańa perzenthana ashylady. Óńirde 300 orynǵa arnalǵan, jalpy quny 59,9 mlrd teńgeni quraityn kópbeiindi aýrýhananyń qurylysy da jalǵasyp jatyr.
Aldaǵy kezeńge arnalǵan qurylys josparynda áleýmettik mańyzy joǵary 25 joba bar. Bilim berý salasynda Qasym Qaisenov kentinde, Praporshikovo aýylynda, Zaisan qalasy men Óskemende tórt mekteptiń qurylysy bastalýǵa daiyn. Taǵy jeti mektep pen Ridder mańyndaǵy qala syrtyndaǵy balalar lageriniń jobalary ázirlenip jatyr.
Sport pen mádeniet salasynda da aýqymdy josparlar bar. Oblys ortalyǵynda Voleibol ortalyǵynyń qurylysy júrip jatyr, Ústel tennisi akademiiasynyń qurylysy bastaldy. Budan bólek, jabyq fýtbol stadionyn, 10 myń oryndyq Muz arenasyn jáne 1 500 adamǵa arnalǵan Kongress-holl salý kózdelgen.
Ridder qalasyndaǵy sporttyq infraqurylym da jańa nysandarmen tolyqpaq. Munda shańǵy-roller trassasyn salý, «Sokol» stadionyn jańartý, jabyq hokkei modýlin ornatý jáne shańǵy tramplinderin damytý josparlanǵan.
Osylaisha, Shyǵys Qazaqstan oblysynda aldaǵy Jalpyhalyqtyq aýqymdy qurylys jylyna daiyndyq turǵyn úi kólemin arttyrýmen ǵana shektelmeidi. Injenerlik jelilerdi damytý, meditsinalyq kómektiń qoljetimdiligin jaqsartý, bilim berý, sport jáne mádeniet nysandaryn kóbeitý arqyly óńirdiń infraqurylymyn keshendi jańǵyrtýǵa basymdyq berilip otyr.
