Astanadaǵy «Taldau AI Analytics» analitikalyq ortalyǵynda Qazaqstan Respýblikasy Prezidenti Qasym-Jomart Kemeluly Toqaevtyń Qazaqstan halqyna Joldaýyn talqylaýǵa arnalǵan dóńgelek ústel ótti. Is-sharaǵa memleket jáne qoǵam qairatkerleri, memlekettik organdardyń ókilderi, sarapshylar men akademiialyq qaýymdastyq músheleri qatysty, dep habarlaidy dalanews.kz
Dóńgelek ústelge qatysýshylar el damýynyń basym baǵyttaryn, ózekti ekonomikalyq jáne áleýmettik syn-qaterlerdi, sondai-aq Qazaqstannyń jańa tarihi kezeńiniń negizgi mindetterin talqylady.
Dóńgelek ústel aiasynda memleket jáne qoǵam qairatkeri, «Taldau AI Analytics» analitikalyq ortalyǵy Qamqorshylyq keńesiniń Tóraǵasy Máýlen Áshimbaev sóz sóilep, Memleket basshysy aiqyndaǵan strategiialyq basymdyqtardy iske asyrýdyń negizgi máselelerine toqtaldy.
Máýlen Áshimbaev Memleket basshysy Qasym-Jomart Toqaevtyń Joldaýy Qazaqstan damýynyń jańa tarihi kezeńine arnalǵan strategiialyq baǵdarlardy aiqyndaitynyn atap ótti. Onyń aitýynsha, sońǵy jyldary júzege asyrylǵan aýqymdy saiasi reformalar, jańa Konstitýtsiianyń qabyldanýy jáne memlekettik basqarý júiesiniń jańǵyrýy eldiń odan ári damýyna berik institýtsionaldyq negiz qalady. Endigi basty mindet – osy ózgeristerdi árbir azamattyń ómirinen naqty kórinis tabatyn nátijelermen tolyqtyrý.
«Prezidentimiz Qasym-Jomart Kemeluly Toqaevtyń Joldaýy – strategiialyq mańyzy zor qujat. Aldaǵy kezeńde Taldau sarapshylar qaýymdastyǵynyń músheleri men azamattyq qoǵam ókilderiniń memlekettik saiasatty saraptamalyq turǵydan pysyqtaýǵa jáne Memleket basshysy aiqyndaǵan jańǵyrtý kún tártibin iske asyrýdyń barynsha tiimdi tásilderin ázirleýge belsendi atsalysýy mańyzdy», – dedi Máýlen Áshimbaev.
Atap aitqanda, ol tsifrlyq sheshimder men jasandy intellektini keńinen engizýdi, sondai-aq jumyspen qamtýǵa, kásipkerlikti damytýǵa jáne halyqtyń tabysyn arttyrýǵa jańa múmkindikter ashýdy kózdeitin «Halyqtyq tsifrlyq ekonomika» tujyrymdamasynyń mańyzdylyǵyna toqtaldy.
Sonymen qatar infraqurylymdy keshendi damytý men jańǵyrtýǵa, atap aitqanda, jol salý jáne jóndeý, injenerlik jelilerdi, áleýmettik jáne ózge de nysandardy jańartýǵa baǵyttalǵan «Halyqtyq qurylys» baǵdarlamasyna erekshe nazar aýdardy.
Máýlen Áshimbaevtyń aitýynsha, bul jobalardy belgilengen merzimde júzege asyrýmen qatar, biýdjet qarajatynyń tiimdi ári ashyq jumsalýyn qamtamasyz etý, onyń ishinde qoǵamdyq baqylaý tetikterin keńinen qoldaný airyqsha mańyzǵa ie.
Sóz sońynda Máýlen Áshimbaev Joldaýda aiqyndalǵan basymdyqtardy tiimdi iske asyrý memlekettik organdardyń, sarapshylar qaýymdastyǵynyń jáne azamattyq qoǵam ókilderiniń kúsh-jigerin jumyldyryp, ortaq
is-qimylyn úilestirýdi talap etetinin atap ótti.
Talqylaýǵa sondai-aq «Atameken» Ulttyq kásipkerler palatasy Tóralqasynyń tóraǵasy Qanat Sharlapaev, Qazaqstan Respýblikasy Jasandy intellekt jáne tsifrlyq damý vitse-ministri Baqtiiar Muhametqaliev, ekonomister Rýslan Sultanov pen Asqar Qysyqov, saiasattanýshy, L.N. Gýmilev atyndaǵy Eýraziia ulttyq ýniversitetiniń prorektory Indira Rystina, qarjyger Rasýl Rysmambetov, Qazaqstan Respýblikasy Ekologiia jáne tabiǵi resýrstar ministrligi Qoǵamdyq keńesiniń tóraǵasy Eldos Abaqanov qatysty.
Dóńgelek ústel qorytyndysy boiynsha qatysýshylar konstitýtsiialyq reformany saraptamalyq turǵydan súiemeldeýdiń mańyzdylyǵyn atap ótip, aldaǵy ýaqytta da syndarly yntymaqtastyqty jalǵastyrýǵa jáne kásibi dialogty odan ári damytýǵa nietti ekenderin bildirdi.
