Qazaqstanda Kaspii teńizi arqyly Ázerbaijanǵa munai tasymaldaityn jańa baǵyt ashylýy múmkin. Joba júzege assa, qubyr 2032 jyly iske qosylady, dep habarlaidy dalanews.kz.
Jańa qubyr arqyly Teńiz, Qashaǵan jáne Qarashyǵanaq ken oryndarynan óndirilgen munaidy Ázerbaijanǵa jetkizý josparlanǵan.
Atyraý oblysynyń Tabiǵi resýrstar jáne tabiǵat paidalanýdy retteý basqarmasy "QMG Qashaǵan B. V." kompaniiasynyń Qazaqstandaǵy filialy usynǵan qujatty jariialady. Onda jobanyń aldyn ala merzimderi kórsetilgen. Qurylys 2029 jyly bastalyp, shamamen úsh jylǵa sozylýy múmkin.
"QMG Qashaǵan" kompaniiasy munai tasymaldaýdyń úsh nusqasyn qarastyryp jatyr. Alǵashqy eki nusqa boiynsha Atyraý mańynan Quryq portyna nemese Ájibai aýdanyna deiin munai qubyry tartylady. Odan ári munai Kaspii teńiziniń túbimen Ázerbaijandaǵy Shorabad aýdanyna jetkiziledi. Úshinshi nusqada Quryqqa deiin qubyr tartylyp, munai teńiz arqyly tankerlermen tasymaldanady.
Úsh nusqada da munaidy keiin Baký - Tbilisi - Jeihan qubyryna baǵyttaý kózdelgen.
Negizgi jospar boiynsha jylyna 18,2 million tonna munai tasymaldanady. Al teńiz túbimen qubyr tartylatyn eń joǵary qýatty nusqada bul kórsetkish 37 million tonnaǵa jetýi múmkin.
