Áleýmettik jelide 17 qarashada álem boiynsha internet óship, daǵdarys bastalatyny týraly aqparat tarady. Osyǵan bailanysty Qazaqstannyń Tótenshe jaǵdailar ministrligi túsinikteme berdi, dep habarlaidy dalanews.kz.
Jelide taraǵan habarlamada 17 qarashadan bastap internet úsh aiǵa óshetini, iri bankterge hakerlik shabýyl jasalatyny jáne COVID 2.0 bastalatyny aitylǵan. Sondai-aq, adamdarǵa azyq-túlik, sý jáne qolma-qol aqsha jinap qoiýǵa keńes berilgen.
Alaida TJM mundai qaýip týraly resmi eskertý taratpaǵanyn málimdedi.
"Búginde TJM halyqty shuǵyl túrde azyq-túlik, sý jáne dári-dármek qoryn jinaýǵa shaqyratyn resmi eskertý jasaǵan joq", - dedi ministrliktiń baspasóz qyzmeti.
Degenmen vedomstvo tótenshe jaǵdailarǵa daiyndyq retinde úsh táýlikke (72 saǵat) jetetin qajet zattardy aldyn ala daiyndap qoiýǵa keńes berdi. Olardyń qatarynda aýyzsý, qujattar, qolma-qol aqsha, bailanys quraldary, qýattaǵyshtar, qolsham jáne jyly kiim bar.
Ministrlik tótenshe jaǵdailarǵa táýlik boiy monitoring júrgiziletinin jáne azamattardyń qaýipsizdigin qamtamasyz etý jumystary baqylaýda ekenin málimdedi.
