Áleýmettik jelilerde 17 qarashada jahandyq internet óship, bankterge hakerlik shabýyl jasalatyny týraly habarlamalar tarady. Osyǵan bailanysty jurtshylyq arasynda azyq-túlik pen sý qoryn aldyn ala jinap qoiý qajettigi talqylanyp jatyr. Qazaqstannyń Tótenshe jaǵdailar ministrligi bul aqparatqa qatysty túsinikteme berdi, dep habarlaidy dalanews.kz.
Áleýmettik jelilerde álem boiynsha taraǵan boljamǵa sáikes, 17 qarashada jahandyq internet úsh aiǵa óshiriledi-mys. Sondai-aq iri bankterge hakerlik shabýyl jasalyp, paidalanýshylardyń esepshottaryndaǵy barlyq qarajat týraly derekter joiylady degen aqparat taraǵan.
Bul týraly X áleýmettik jelisindegi Wesleysimplic esimdi qoldanýshynyń jazbasy keńinen talqylanyp jatyr.
Jazba avtorynyń aitýynsha, internetke jappai kibershabýyl jasalyp, «COVID 2.0» dep atalatyn jańa jaǵdai bastalýy múmkin. Onyń boljamynsha, myńdaǵan adamnyń bank shotynda nól kórsetilip, qarajatty qalpyna keltirý múmkin bolmaidy. Osydan keiin jahandyq internet úsh aiǵa ajyratylady-mys.
Avtor adamdardy azyq-túlik, sý, altyn, kúmis, qarý-jaraq jáne qolma-qol aqsha jinaýǵa shaqyrǵan. Alaida bul aqparatty rastaityn resmi derek joq.
TJM ne deidi?
NUR.KZ redaktsiiasy Qazaqstannyń Tótenshe jaǵdailar ministrligine saýal joldap, halyqqa azyq-túlik, sý jáne dári-dármek qoryn jinaýǵa qatysty qandai da bir eskertý jasalǵan-jasalmaǵanyn suraǵan.
Ministrlik mundai resmi eskertý taratylmaǵanyn málimdedi.
«Qazirgi ýaqytta TJM halyqqa azyq-túlik, sý jáne dári-dármek qoryn shuǵyl jinaý qajettigine bailanysty boljanǵan qaýipter nemese tótenshe jaǵdailar týraly resmi eskertý taratqan joq», – dep habarlady vedomstvonyń baspasóz qyzmeti.
Azyq-túlik qoryn jinap qoiý qajet pe?
Sonymen birge TJM tótenshe jaǵdailarǵa daiyndyq aiasynda ár azamattyń úsh táýlikke (72 saǵatqa) jetetin eń qajetti zattar qoryn aldyn ala daiyndap qoiǵany durys ekenin atap ótti.
Mundai qordyń ishinde aýyzsý, jeke qujattar, qolma-qol aqsha, bailanys quraldary men qýattaǵyshtar, qolsham jáne jyly kiim bolǵany jón.
Iaǵni ministrlik qazaqstandyqtardy 17 qarashaǵa bailanysty alańdaýǵa shaqyrǵan joq. Úsh kúnge jetetin qajetti zattardy daiyndaý – tótenshe jaǵdailarǵa arnalǵan jalpy saqtyq sharasy.
