Astanadaǵy kassatsiialyq sot jýrnalist ári belsendi Mirbolat Myrzataiulyna qatysty úkimdi ózgerissiz qaldyrdy. Ol ulttyq arazdyqty qozdyrdy dep aiyptalyp, tórt jylǵa bas bostandyǵynan aiyrylǵan. Al blogerdiń ózi memlekettik organ ókilderinen memlekettik tilde sóilesýdi talap etkenin aitqan, dep habarlaidy dalanews.kz.
Facebook áleýmettik jelisiniń qoldanýshysy Gúleke Ómirjátegi kassatsiialyq sottyń sheshimine qatysty pikir bildirdi. Onyń aitýynsha, sot jýrnalist pen belsendiniń tórt jylǵa sottalǵany týraly úkimdi kúshinde qaldyrǵan.
«Búgin Astanadaǵy kassatsiialyq sot taǵy da ádiletsiz sheshim shyǵardy. Óz elinde memlekettik tildiń mártebesin saqtaýdy talap etkeni úshin tórt jylǵa bas bostandyǵynan aiyrylǵan jýrnalist ári belsendi Mirbolat Myrzataiulyna qatysty úkim ózgerissiz qaldy. Bul – óz ana tiliniń quqyǵyn qorǵaǵan azamatty qoldaýdyń ornyna temir torǵa toǵytqan júieniń kezekti soqqysy», – dep jazdy ol.
Sondai-aq 3 qarashada ótken sot otyrysynan keiin belsendiniń jubaiy Gúlshat Bishýinova da kassatsiialyq sottyń úkimdi ózgerissiz qaldyrǵanyn habarlady.
Eske salaiyq, byltyr qarashada Almaty qalasynyń Medeý aýdandyq soty Mirbolat Myrzataiulyn (Bishýinov) tórt jylǵa bas bostandyǵynan aiyrǵan bolatyn. Oǵan Qylmystyq kodekstiń 174-baby 1-bóligi, iaǵni «Áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý» baby boiynsha aiyp taǵylǵan.
Aiyptaý aktisindegi málimetke sáikes, 2025 jylǵy sáýirde Almatydaǵy qoqys shyǵaratyn uiymdardyń birinde mekeme basshysy men bloger arasynda qazaq tilin qoldanýǵa bailanysty janjal bolǵan. Mirbolat Myrzataiuly osy oqiǵanyń videosyn áleýmettik jelide jariialaǵan.
Beinejazbada blogerdiń mekeme basshysyna: «Basshylyq qyzmette otyryp, memlekettik tildi qurmettemeisiz. Biz sizden ornyńyzdy dereý bosatýdy talap etemiz», – degen sózderi estiledi. Dál osy video qylmystyq istiń qozǵalýyna negiz bolǵan.
Mirbolat Myrzataiuly ózine taǵylǵan aiyppen de, sot úkimimen de kelispegen. Qazir ol Almaty oblysyndaǵy Zarechnyi kentinde ornalasqan túzeý mekemesinde jazasyn ótep jatyr.
55 jastaǵy Mirbolat Myrzataiuly – YouTube jelisindegi «Jýrnalistik zertteýler agenttigi» arnasynyń avtory. Arnada negizinen eldegi sot protsesteri, mitingiler men piketter týraly materialdar jariialanady. Ol buǵan deiin uzaq jyldar boiy memlekettik telearnalarda jumys istegen.
